lipu tenpo li jo e lipu Patreon! o kama sona e ni!

lipu tenpo logo

lipu tenpo

toki musi pi kijetesantakalu lawa

jan jan pi nimi ala tenpo 2024-02-07 lipu nanpa tenpo musi musi

kijetesantakalu Winsen li lawa e soweli ale. soweli ale li olin e ona tan ni: ona li lawa pona. ma soweli li ma kasi suli lon poka pi ma tomo. jan mute li lon ma ni. tenpo ala la jan en soweli li utala. taso tenpo lete li kama. jan li wile jo e moku tawa tenpo lete. tan ni la, jan li open alasa. kijetesantakalu lili li lukin e jan kama. ona li toki e ni kepeken kalama mute: “soweli ale o! jan mute li kama! ona li wile moli e mi mute!”. soweli Winsen li kute e kijetesantakalu lili, li pilin ike mute tan ni: moli soweli li ike tawa ona. taso ona li ken ala pali tan ni: ilo utala pi jan mute li wawa.

old-looking raccoon, dressed regally

jan li weka tawa soweli. taso ona li ken pana e moli tawa soweli kepeken ilo utala. soweli lili mute li jo ala e mama; soweli suli mute li jo ala e soweli lili. jan li pilin pona mute tan ni: insa pi sijelo soweli li moku pona tawa ona. soweli Winsen li pilin pakala mute. ona li wile pana e pilin pakala tawa jan ike. soweli mute kin li wile ni.

tenpo suno kama la, soweli mute li open sona e nasin tan ni: ona li wile pana e pilin pakala tawa jan. kijetesantakalu Winsen li lukin e kon sewi. waso mute li lon ona. soweli Winsen li toki e ni: “waso mute o! o pana e ko jaki sina tawa jan!”. waso li pali e ni: ona li tawa ma tomo, li pana e ko jaki mute. tan ni la, jan li toki e pakala kepeken kalama mute. ni li pona tawa soweli, taso jan mute li pilin ike. tenpo ni la, ma tomo li nasa li pakala li jaki mute.

tenpo kama poka la, jan ale li tawa sewi pi tomo ona. ilo moli li lon luka ona. jan li open pana e sike moli lili tawa waso. taso kon en lawa en oko pi jan ale li pakala tan ko jaki. tan ni la, sike moli lili li pakala ala e waso. tan ni la, soweli ale en waso ale li pilin pona mute a! taso kijetesantakalu Winsen li wile e ni: soweli ale li pakala e pilin jan.

tenpo pimeja kama la, soweli ale en waso ale li tawa ma tomo. kijetesantakalu mute li pakala e poki jaki. soweli li ike e sijelo jan. waso li pana e ko jaki tawa sewi tomo. kala mute li kama tan telo suli. ona li ni kepeken nasin nasa a! jan li toki e ni tawa soweli: “mi pilin ike! o pini e pakala! tenpo kama la, mi pakala ala e soweli! o pini! o pini!”

tan ni la, soweli en waso en kala li pini e pakala. tenpo kama poka la, jan en soweli li pilin pona mute. tenpo ni la, jan li jo ala e ilo moli, waso li pana ala e ko jaki lon ma tomo! soweli ale li wile ala pakala e jan. jan li wile ala alasa e soweli.

tenpo ni la, jan en soweli li utala ala! tan ni la, soweli ale li olin e kijetesantakalu lawa Winsen. pona li lon, utala li weka.