nasin sitelen mute li ken e toki pi lipu ni. taso lon la, jan mute li kepeken nasin pi mute ala. ona li wile pana e toki ni tawa lipu la, ona pana e sitelen kepeken nasin Lasina anu nasin pali sin pi jan Sonja. nasin ni nanpa wan la, kalama wan li kama sitelen wan. nasin ni nanpa tu la, nimi wan li kama sitelen wan. nasin ni li pona mute tawa mi. taso ona li sin a. sin ona la, mi wile pana e sitelen kepeken ona tawa ilo sina la, mi kama ala kama ken? ike la, mi ken ala pana e ijo pi wile mi tawa ilo ale. taso ni li ken awen ala. ni li ken ante. nasin li ken e ante.

jan li pana e sitelen tan ilo ona tawa ilo ante la, ilo nanpa wan en ilo nanpa tu o sona sama e sitelen. sona li ken tan nasin Juniko. nasin Juniko li pana e sona sitelen sama tawa ilo ante. ilo li awen sin e sona pi nasin ni la, ilo li ken sona e sitelen ale pi nasin ni. ni li pona sona ilo! sitelen sin li lon nasin ni la, mi ken pana e sitelen tawa ilo ante a. mi wile!

kulupu li pali lon lipu pi suli mute li wile pana e ona tawa kulupu lawa pi nasin Juniko. kulupu lawa li lukin e lipu mi la lipu o pona tawa ona o kama e sitelen sin tawa nasin ona. pali mute li pini. pali mute li awen. pali mute li kama. taso mi kulupu li pilin pona wile.

taso mi kama lukin e toki pi jan lukin: lipu pi pali mi li pini la, lipu ni li pona ala pona tawa kulupu lawa? ona li wile sona e ni la, mi wile toki e ijo ken.

o sona! jan li pali e toki sin e sitelen sin sama jan Sonja lon tenpo ante.
toki Olapi (Volapük) li jo e sitelen sin: Ꞛꞛ Ꞝꞝ Ꞟꞟ. toki Epelanto li jo e sitelen sin: Ĉĉ Ĝĝ Ĥĥ Ĵĵ Ŝŝ Ŭŭ. ona ale ala li lon toki Epelanto taso. taso ona li kama tan toki Epelanto, li lon nasin Juniko. ni la, sitelen sin pali li ken.

taso kulupu Juniko li toki tawa mi kulupu la, lon sitelen taso li pona ala. ona li wile sona e ijo mute tan mi. jan pi mute seme li kepeken sitelen sin pi wile mi? mama ona Sonja taso anu jan pi mute lili taso li ken ala e sin sitelen tawa nasin. pona la, kulupu li lili ala li kepeken sitelen sin wile lon tenpo mute. jan li kepeken ala kepeken sitelen wile lon tenpo mute? lukin la, jan li kepeken sitelen ni lon tenpo ale a.

sona sitelen li awen ala awen tawa jan pi sona ona ala? tomo lili pi sona sin anu tomo suli pi sona sin li pana ala pana e sona sitelen? sona sitelen li lon ala tomo ni, taso jan li awen kama sona e sitelen, li awen kama mute. jan li kama sona toki la, ona mute li kama sona sitelen kin. jan Kekan San en lipu mute en ilo mute li pana e sona sitelen.

jan seme li kepeken sitelen? ona li kepeken sitelen lon ma seme? jan kulupu li lon ma mute mute li lon ilo mute li lon lipu mute.

a, taso sitelen sin ante li tan toki sin pali, li lon ala nasin Juniko. ni li tan seme? jan Tokin (Tolkien) li pali e toki Kuwenja e toki Sintalin la, ona li pali e sitelen Tenwa kin. sitelen musi Ta Te li sitelen e tenpo kama, e mun weka, e tomo pi tawa mun, e jan pi mun weka la, kulupu Sinan pi sitelen ni li toki Sinan, li kepeken sitelen Sinan. jan li lukin pana e sitelen Tenwa, e sitelen Sinan tawa nasin Juniko, taso tenpo pi lipu ni la, ni li ken ala a. seme la, ni li kama ala ken? open la, kulupu pi nasin Juniko li wile e sitelen sin ni, taso ijo ike wan li lon li pakala e ken pana: sitelen sin pali ni li tan ala ma, li tan ala kulupu suli – sitelen li tan jan wan anu kulupu esun wan. ona tan li ken lawa e sitelen, li ken wile e mani lon sitelen.
sitelen pi wile mi la, ni li sama ala sama? ala a! toki pi jan Sonja la, mama sitelen Sonja li lawa ala e sitelen, li wile ala e mani lon sitelen.

ni ale la, mi pilin pona. sitelen pona pi wile mi li ken tawa nasin Juniko. lon la, ni li wile e pali mute a, e sona nasin wawa. pona la, jan mute li pali mute tawa ni. pona kin la, jan Lepeka li sona wawa e nasin, li pali mute kin. nasin li awen wile e pali, e tenpo. taso mi awen pali la, mi kama ken.