ken la, sina jo ala e ma kasi sina. taso sina jo e supa pi poka lupa! sina wile la, sina ken mama e kasi moku lon tomo sina, lon supa pi poka lupa!

sina ken mama e kasi mute lon tomo sina. mi toki e sona pi kasi luka lon anpa.

kasi namako

kasi namako mute li lon. ma mi la, sina ken esun e ona lon esun moku! namako li pona mute tawa moku. sina ken mama e namako kepeken tenpo lili.

kasi pi kili loje

kili loje pi suwi lili li pona mute tawa moku. kili loje suwi li pona kin, taso kasi ona li suli. sina jo e kili loje la, o open e ona. o kama jo e sike lili kasi tan ona. sina ken pana e sike lili lon poki ma. poki ni la, o pana e poki ma namako lon sewi pi sike lili. o pana e telo! tenpo ni la, o awen, o awen telo e ma. kasi li lon la, sina ken pana e ona lon poki ma suli. kasi li suli la, ona li ken kama pakala. tan ni la, ken la, o kepeken e palisa tan ni: kasi li ken pakala. ona li ken jo pona e kasi. ni la, kasi li awen pona. kas ona li loje la, sina ken moku e ona.

kasi pi kili seli

pilin uta seli li pona tawa sina la, o mama e kasi pi kili seli! kin la, kili sama pi seli ala li lon. sina ken kama jo e sike lili kasi tan ona. pali mama ona li sama kasi pi kili loje. tawa ona la o lukin e toki sewi.

kasi pi kili poki

kili poki li jo insa e kili lili. ona li jo e ijo pona tawa sijelo sina! sina moku ala e soweli la, kili poki li pona mute a. sina wile mama e kili poki, li wile lukin e ona la, o pali e ni: o kama jo e poki pi kule ala. o telo e lipu. o pana e lipu telo lon insa poki. o pana e kili lili lon selo insa poki. ni la, suno li ken suno e kili lili en sina ken lukin e ona. o awen telo e lipu! kasi li kama suli la, o pana e ona tawa poki ma. poki ma la, o pana kin e telo.

kasi pi kili loje suwi lili

kili loje lili li suwi a. mi la, ona li pona mute. kin la, telo ko ona li pona! kasi ona li lili. ni la, ona li pona mute tawa supa pi poka lupa sina! kasi ona li awen anpa, li tawa sewi ala. ni la, o kama jo e poki ma suli. o pana e sike kasi lili lon ma. o pana e telo. pona la, kasi pi kili loje lili li ken awen lon tenpo sike mute! ni la, sina ken moku e kili mute tan ona!