o kepeken ala ilo ike ni
jan mute li pali e pali pona · ona li pana e pali ona tawa kulupu · ni la jan ali li ken kepeken ona · jan li ni la ona o ni olin · sina kepeken pali pi jan ante la o toki e nimi ona lon pali sina o pana e pali sina kin tawa kulupu · jan mute pali li toki e ni ·
jan mute li kepeken pali pi jan ante · jan mute li pali e pali sin · jan li olin e pali li esun e pali · pali kulupu li kama mute · kulupu li wawa ·
taso kulupu ante li oko e pali ni ali · pali kulupu li mute suli · toki pi mute a li lon ona · ni li wawa · ona li wile kepeken wawa ni · tawa ni la ona li pali e ilo · ilo ni li kama moku e toki ali · ona li kama ken toki e toki mute tan ni ·
kulupu mama li kepeken pali kulupu · ni la ona o toki e nimi pi jan pali ali o pana e pali ona kin tawa kulupu · taso ona li ni ala · sina pana e mani tawa ona la ni taso la sina ken kepeken ilo ona · jan mute li pana e olin e wawa lon pali ona · taso ilo ike li moku e wawa ni li moli e olin ni · ona li esun ala li moku taso ·
ilo ni li pali e seme · ona li ken pali e pali sama kulupu · ni la kulupu olin li kama wile ala · ilo taso li wile · kulupu li ken moli ·
kulupu mama¹ li pali e ilo² pi ike suli · a jan mute li pali mute · taso ike li tawa ona · tan ni la o kepeken ala ilo ni o weka lon mama ona ·
¹ GitHub
² GitHub Copilot