nimi li jo e kalama. taso mi wile pana e kalama nimi ale tawa sina la sina ken sona kepeken nasin seme? mi o kalama seme e kalama lili ni? a, nasin mute li ken. mi ken pana e kalama taso: jan ni li jan Losu - kalama pi nimi ona li ni - L, O, S, U. taso ni li ken ike tawa sona kute. ni la mi o seme. lon la mi ken wawa e kalama. taso nasin ante li lon.

mi ken pana e kalama ante lon poka. pana ni la, sina ken sona kute pona. nasin li ni: kalama A en kalama E en kalama I en kalama O en kalama U li kalama suli li wile ala e kalama ante lon poka. kalama ante ale la kalama poka o lon. kalama seme o lon poka? kalama I li ken ike lon kalama T lon kalama J, kalama U en kalama O li ken ike lon kalama W. kalama E taso en kalama A taso li awen. kalama pi jan Losu li ken ni: La, O, Sa, U. ona li ken ni kin: Le, O, Se, U.

taso nasin ante kin li awen ken. kalama poka wan li pona e sona kute la kalama poka tu li ken pona suli e kute. nimi pi jan Losu li ken ni: Ala, O, Asa, U. a, taso kalama Ala li sama nimi “ala” a. kalama E li ken pona tawa ni: Ele, O, Ese, U.

taso nasin ante kin kin li awen ken. nasin sitelen la, mi ken pana e kalama wan kepeken nimi wan lon insa pi selo poki.

ni li ken lon nasin uta kin. kalama pi nimi Losu li open sama nimi ni ale: lon, ona, supa, uta.

suli la, nasin wan taso li lon ala. lon la, nasin ale li ken nasa tawa uta li ken nasa tawa kute. musi la, mi wile lukin e nasin ante wan: toki Inli en toki ante mute la, jan li mu wan e kalama ale tawa musi. mu musi ni la, jan li ken awen pona e kalama lon sona ona.

mi ni sama la, mi kama lukin e ijo musi:
A, E, I, Ja, Ka, La, Ma, Na, O, Pa, Sa, Ta, U, Wa
sina kin li lukin ala lukin e ijo ni? kalama tu wan li sama nimi: Ka, La, Ma. kalama. sama a. ni la… mi ken ala ken kepeken nasin sama tawa ale pi mu musi?
ken!
a e i-jo ka-la-ma, ni o un-pa ton-si wan
aaa, musi, musi. taso nimi “e” li lon ala pona.

mi alasa e ijo kalama pona e toki pona:

uta ni o kalama e ijo sewi anpa
unpa tonsi kalama o wan taso e ni a
uta waso kalama, ijo o pan e ni a

a taso mi sona, mi sona: kalama “n” li lon pini la jan mute li kepeken nasin tenpo ante lon kalama. mi wile e nimi Kalama e kalama pini N ala la mi alasa sin e nimi ken:

uta sewi kalama o pana e ijo a
uta suwi kalama o pana e ijo a
uta sewi kalama o pona e ijo a
uta suwi kalama o pona e ijo a
uta waso kalama o pana e ijo a
uta waso kalama o pona e ijo a
ijo uta sewi a o pini e kalama
uta suwi pini o kalama a e ijo
waso uta kalama o pini e ijo a
ijo pona kalama o sewi e uta a
pona ijo kalama o uta e suwi a
uta anu kalama o pu e ijo sewi
uta anu kalama o suwi e ijo pu
waso anu ijo pu o uta e kalama

nasin ni li awen nasa, li musi taso. o awen ala e ona lon sona sina. o awen e ona lon musi sina, a a a.