lipu tenpo li jo e lipu Patreon! o kama sona e ni!

lipu tenpo logo

lipu tenpo

ilo tenpo poki

jan jan Alonola tenpo 2024-02-07 lipu nanpa tenpo sona sona

tenpo ale la, jan li wile sona e tenpo. taso tenpo pini la, ilo tenpo li lon ala. ni la, jan li pali e ilo tenpo nanpa wan: ma Tosi la, jan mute li open pali e ilo tenpo. mute la, jan li toki e ni: jan Peta Enlan (Peter Henlein) li pali e ilo tenpo nanpa wan. ona ni li sike suli, li jo e luka wan taso. kin la, ona li tawa ike, li nasa. sina sona ike e tenpo tan ona. kama la, ilo tenpo li mu lon tenpo wan.

drawing of two old pocket watches

tenpo kama la, ilo tenpo li kama ante. ona li kama lili, li tawa pona. ni la, sina sona e tenpo tan ona. jan li jo e poki lon len ona la, ilo tenpo li ken lon poki ni. ilo tenpo poki li lon! ona li kama jo e sinpin ni: sina ken lukin e insa ona. sina wile pana e wawa tawa ilo tenpo la, sina kepeken e ilo palisa. wawa li awen lon sike wawa pi ilo tenpo. sina wile ante e tenpo ilo la, sina kepeken kin e ilo palisa. sina kepeken e ilo palisa la, sina tawa sike e sike lili lon ilo tenpo.

ilo sin mute li kama lon, li pona e ilo tenpo. ma Mewika la, jan li open pali e ijo sama mute. ijo li sama la, jan li ken pali e ilo tenpo mute. ilo tenpo li pakala la, jan li ken pona e ona kepeken ijo sin. ni la, jan mute li ken esun e ilo tenpo kepeken mani lili.

ma Elopa la, jan li ken pali ala e ilo tenpo mute tan ni: ma Mewika la, jan li pali e ilo tenpo mute pi mani lili. ni la, jan li pali e ilo tenpo pona a lon ma Suwasi. jan li esun e ona kepeken mani mute a.

taso ilo tenpo sin li kama lon: jan li wile ala e ilo tenpo poki, li wile e ilo tenpo luka tan ni: ilo tenpo luka li lon luka. jan li ken lukin e ona kepeken pali lili.