ma Elena pi tenpo pini la, jan Akimete li pana e sona mute; ona li sitelen e sona lon lipu la, mi pi tenpo ni li ken sona e ona. lipu wan la, ona li pana e sona musi ni. o kute:

o jo e kiwen supa suli wan; supa la poka tu tu pi suli sama o lon. o jo e kiwen supa lili mute; kulupu pi kiwen lili la ni taso o lon:

• kiwen luka luka wan la, poka tu wan o lon.
• kiwen tu la, poka tu tu o lon.
• kiwen wan la, poka luka o lon.

(poka ale o suli ante. o lukin e sitelen!)

sina wan e kiwen lili ale la, ona li ken lon kiwen suli. taso, sina wile wan e kiwen ale lon nasin pona ni la, sina utala! musi la, o alasa wan e kiwen ale lon supa. pini la ale o supa: kiwen o ken ala lon sewi pi kiwen ante. nasin mute mute a li ken! kin la, sina ken musi ante kepeken kiwen sama: sina nasin e kiwen lili la, ona li ken sama sitelen soweli, anu sitelen jan, anu sitelen tomo... anu sitelen ante. toki Elena la utala musi ni li kepeken nimi 'ὀστομάχιον' (Osomakijon).

musi ante pi nasin sama li tan ma Sonko pi tenpo pini. musi Sisopan (七巧板) la o jo e ni taso lon kulupu pi kiwen lili:

• kiwen luka la poka tu wan pi suli sama o lon.
• kiwen wan la poka tu tu pi suli sama o lon.
• kiwen wan la poka tu tu pi suli sama ala o lon.

utala li lili lon musi ni. taso, sama la, sina ken pali e sitelen mute kepeken kiwen lili. o musi pona!