mi lon ma pi kasi mute. kiwen kasi li utala e mi. mi utala e kasi. kalama li utala lon sewi. pimeja li utala e walo la, kon li utala e telo. telo sewi lili wan li utala e ma suli anpa. noka mi li utala e tawa la, mi kama lon tomo. telo mute li utala e ma. telo wan li kama utala e lawa mi. luka mi li utala e sinpin tomo – “jan li lon ala lon insa?” – kalama tomo ala en kalama sewi taso en kalama telo taso li utala e kute mi. telo li kama mute. mi lupa e sinpin tomo li tawa insa.

telo li awen kama tan sewi li kama len e poka ale. kule en kalama ale pi telo ala li kama weka anu seme? a, ala, mi kute e kalama ante wan – “aaaaa” – a, pona, ona kalama li kama: jan li tawa tan len pi telo mute tawa tomo la, mi kama lukin e ona. ona li pilin pi pona ala lon telo. luka ona la, kili mute pi kule mute li awen – “a, pona, alasa sina li kama e ijo moku” – “a, pona, alasa sina li kama e tomo” – ona li tawa insa.

ona li pana e kili tawa mi – “o moku” – “kili ni li pona ala pona? mi wile ala moli” – “pona. mi alasa e sona kili lon ilo mi. sona ilo la, kili ni li pona e sijelo.” – mi jo, mi moku, pilin mi li kama pona – “sina pona a. kili ni li suwi pona” – “sina kin li suwi. sina open e tomo la, telo li utala ala e mi” – ijo li nasa tawa mi lon toki ona ni – “seme? sina toki e mi la, sina toki ala toki e suwi?” – “toki” – “taso kili li suwi. mi moku e ona. suwi ona li pona e mi lon moku. mi suwi la, sina wile ala wile moku e mi?” – “wile ala, a a” – “ni la, mi suwi ala” – “sina suwi kin” – “suwi ala” – “suwi kin” – “ala” – “kin” – “aaa” – “aa. o kute. sina wile ala e nimi suwi lon sina la, mi kepeken ala nimi suwi lon sina” – “a. mi. mi sona ala”

mi en ona li awen li kute e kalama telo li moku e kili. ni li kama nasa tawa ona kin – “lon la, sina suwi. taso mi sona tan seme? kili ni la, mi kama sona kepeken uta” – ona li insa e kili lon uta – “lon. sina uta e kili la, sina sona e suwi ona. taso sina uta ala e mi. uta la, mi suwi ala” – “a. ijo pi uta ala la, sina suwi ala suwi?” – “seme? ijo seme?” – “mi wile sona e suwi kili la, mi moku e ona kepeken uta. mi wile sona e suwi sina la, mi moku e sina kepeken seme” – “ike a. sina wile moku kin e mi” – “a a a, mi wile ala moli anu pakala anu ike anu insa e sina. taso mi wile moku e suwi sina tawa sona mi” – “aaa, o pana ala e uta sina tawa mi” – “pana ala a. uta mi li moku ala e suwi sina” – “seme” – “mi moku e suwi sina e kon sina e sona sina kepeken ijo ante” – “a. ni la, mi suwi tawa ala uta. taso mi suwi tawa ijo ante” – “suwi”

mi lukin e kili wan. lon luka la, ona li laso pona tawa mi – “sina moku e mi kepeken lukin la, mi suwi ala suwi” – “a a a, sina ike ala tawa lukin mi. taso mi toki e ijo ante” – “sina moku e mi kepeken seme” – “pilin. mi pilin e sina la, mi sona e suwi” – “a, mi kin li kama sona e suwi lon sina. kute mi li moku e toki sina la, ni li suwi” – “a, toki pona” – “toki pona”

kalama utala li kama lili lon sewi lon poka tomo lon ma lon kasi – “mi ken tawa sin lon tenpo” – “ken” – “ni li tomo pi jan seme” – “sona ala. taso tomo wan li lon la, tomo ante li ken lon” – “mi o alasa a” – suno li kama tan pimeja sewi, li suwi e ma, e kasi, e selo mi. pilin suwi li lon, li ijo moku ala