open

musi lipu pi meli pimeja (toki Inli la “Black Lady”) la, sina wile kama ala jo e lipu tan supa! tan seme? sina wile weka tan lipu pilin (♥️) tan lipu ilo pi meli lawa (Q♠️) a! musi ni li lon nasin ilo Winto lon tenpo pini. nimi ante pi musi ni li musi lipu pilin (toki Inli la “Hearts”).
musi ni li kepeken lipu Kanse. lipu li jo e kule (kasi: ♣️, ilo: ♠️, pilin: ♥️, kiwen: ♦️) e nanpa (A, K, Q, J, 10, 9, 8, 7, 6, 5, 4, 3, 2). musi ni la, lipu pi jan musi (Joker) li lon ala. jan tu tu li musi li lon nasin sike lon supa. ona li wile kama jo e nanpa pi lili mute. jan li sitelen e nanpa lon lipu ante.

sike

open sike la, jan wan li nasa e lipu ale. ona li pana e lipu luka luka tu wan (13) tawa jan ale tawa ona sama. jan ale li pana e lipu tu wan tawa jan ante.

• sike nanpa wan (1) la, jan li pana tawa jan soto.
• sike nanpa tu (2) la, jan li pana tawa jan teje.
• sike nanpa tu wan (3) la, jan li pana tawa jan pi poka ante supa.
• sike nanpa tu tu (4) la, jan li pana ala.
• sike pana ni li awen sin lon sike kama.

jan pi lipu kasi nanpa tu (2♣️) o open. ona o pana e lipu ni tawa supa. jan soto li pana e lipu pi kule sama. ona li jo ala e lipu ni la, ona li ken pana e kule ante. lipu li lon supa la, sona ona o len ala. jan ale li pana e lipu wan tawa supa la, sike lili li pini. jan li pana e lipu sewi la, ona li kama jo e lipu ale tan supa. taso, lipu sewi li seme?

• kule pi lipu sewi o sama kule open.
• lipu sewi li jo e nanpa suli. lipu nanpa A li suli mute. lipu nanpa 2 li lili mute.

jan li kama jo e lipu tan supa la, ona o open e sike kama.
open sike la, jan li ken ala open kepeken lipu pilin (♥️). kule open li pilin ala la, jan li pana e lipu pilin la, jan li ken open kepeken lipu pilin. ni li kama lon la mi toki e ni: “pilin li pakala”. jan li jo e lipu pilin taso la, jan li ken open kepeken ona kin.
jan ale li jo ala e lipu lon luka la, sike li pini. jan li kama jo e lipu la, ona li lukin e ona li nanpa e lipu ona:

• lipu pilin (♥️) li pana e nanpa wan (1).
• lipu ilo pi meli lawa (Q♠️) li pana e nanpa luka luka tu wan (13).
• jan wan li kama jo e nanpa mute luka wan (26) tan sike wan la, ona li kama jo e nanpa ni ala. ni la jan ale ante li kama jo e nanpa ni. tenpo ni li ken tan ni taso: jan wan li jo e lipu pilin ale e lipu ilo pi meli lawa. ni la mi toki e ni: “(mi) tawa mun”.

jan wan o sitelen e nanpa lon lipu. sike kama li open. musi li awen.

pini

jan li jo e nanpa ale (100) la, musi li pini. jan li jo e nanpa pi anpa mute la, ona li kama wawa.

mute jan ante

jan tu anu jan tu wan anu jan tu tu li ken musi.
jan tu wan la musi li ante lili. lipu kasi nanpa tu (2♣️) li lon ala. jan li jo e lipu kasi nanpa tu wan (3♣️) la, ona o open. tenpo ale la jan li jo e lipu pi mute sama lon open sike.

• jan tu la, ona li jo e lipu mute luka wan (26).
• jan tu wan la, ona li jo e lipu luka luka luka tu (17).
• jan tu tu la, ona li jo e lipu luka luka tu wan (13).

¹ Windows
² linja nimi lon lipu ni la, kon pi nimi “soto” li poka open
³ linja nimi lon lipu ni la, kon pi nimi “teje” li poka pini