tenpo pini la mi toki e ma Wasikano e ma Monako e ma Samalino. ona li ma lawa pi lili mute lon ma suli Elopa. tenpo ni la, mi wile toki e ma Lisensan e ma Mata. ona li ma pi lili mute kin. o kama sona e pona ona.

ma Lisensan

ma Elopa la ma Lisensan li ma lawa pi lili nanpa tu tu. ona li jo e nena suli mute. ona li lon ala poka pi telo suli. ma taso li lon poka ona. ma lawa pi poka ona kin li lon ala poka pi telo suli. ma ale la ma lawa ante wan taso li sama.

ma tomo Watu li lawa e ma Lisensan. tomo pi jan lawa li lon poka ona. tenpo suno luka luka luka lon mun luka tu wan li sewi e ma. tenpo ni la jan ale li ken kama tawa ma kasi lon poka tomo pi jan lawa. ona li ken kute e jan lawa li ken moku e telo nasa lili. ni li wile e lipu taso e mani ala. tenpo pimeja la jan li pana e suno wawa pi kule mute tawa sewi.

ma Lisensan li ma pi esun wawa. nasa la, sitelen pi tomo mani pi ma Lisensan li sama sitelen pona ‘tu sina’ tawa lukin!

ma Mata

ma Elopa la ma Mata li ma pi lili nanpa luka. telo li sike e ona. suno en tawa telo li pona tawa sina la ma ni li pona mute tawa sina!

sike suno MMMMLA pini la jan open li kama lon ma ni. jan li pali e tomo kiwen pi suli mute. tenpo ni la, tomo ni li majuna mute, taso ona li awen lon a!

tenpo pini la, ma Mata li jo e waso walo pi suli mute (Cygnus falconeri) e soweli pi lili mute pi nena linja (Palaeoloxodon falconeri) e soweli ante mute. ike la, ona ale li moli. taso sina awen ken lukin e kiwen ona li ken kama sona e ona lon lupa Atalan (Għar Dalam).

ma tomo Waleta li lawa e ma Mata. sina ken kama sona e kalama musi e moku pi ma Mata lon ni lon ma tomo ante kin. mi la pan Pasi (pastizz) li pona mute: kili anu kiwen pi telo soweli li lon ona. taso moku ante mute li lon kin.

ma seme li pona tawa sina?