tomo mi li lon ma wan. taso mi en mama mi li tan ma ante. ma tu li lon poka la, ijo mute li sama a. taso lon tenpo mun nanpa luka la, ijo wan li ante a. ona li ijo lili taso, taso mi sona e nasa ni lon sike ale. tenpo nanpa luka li kama sin la, mi en mama mi li toki sama e ijo: “a, tenpo mama li kama” - “a, taso ona li tenpo mama pi ma seme: ma ni anu ma poka?” kulupu ma la, mi o pana e ijo tawa mama lon tenpo suno mama. taso tenpo mama li lon open pi tenpo mun lon ma pi tomo mi, li lon pini pi tenpo mun lon ma poka. ni la mi sona pona ala e nasin la, mi kama pana ala.

mi kama sona: ma mute la, tenpo mama li lon tenpo ante. tenpo mama wan ala kin li lon. tenpo wan li tawa mama meli, tenpo ante li tawa mama mije, tenpo pi mama mama kin li lon.
mi kama sona e nasa ante: tenpo mama li kama tenpo esun. jan Ene Sewe^[1] li kama e tenpo mama lon ma Juwese la, ma ante li kama wile sama. mama pi jan ni li moli la, jan li wile awen e mama lon pilin lon sona. ona li open e tenpo mama lon tomo pi kulupu suli. ona li toki mute mute tawa jan pi mute suli la, lawa pi ma Juwese li kama e tenpo mama tawa ma Juwese. taso ni la, kulupu esun li esun e lipu pi tenpo mama, e kasi suwi. mani li tawa jan esun li tawa kulupu esun, li tawa ala jan Ene Sewe. ona li utala e ni, li kama wile pini e tenpo mama. tenpo mama li tenpo olin taso ala, li tenpo utala kin, li tenpo esun kin.

tenpo mama li awen nasa tawa mi. lon la, mi wile pana e ijo tawa mama. mi pali e pona lon pakala pi tomo mama lon tenpo poka. taso mi ni lon tenpo mute. mi o pana e seme tawa mama olin mi?