seli sin li weka e lape tan ma mi. sina lon ma laso lon poka ma sama, la sina ken lukin e ante tenpo ni: soweli li kama tan lupa lape tawa sewi ma; akesi li weka tan anpa telo; kasi la palisa li pana sewi e kule e kili; insa linja ona li ken e tomo sin tawa waso kama.

pipi kin li lon pali suli ni. ona lili li ken kama lon kulupu suli a, li awen alasa li awen pali lon ma ale. tenpo lili la kulupu wan li kama tawa poka mi, li kama wawa e wile sona; ona li pimeja li jelo, li sijelo lili li pali suli, li tawa musi lon kasi lon kon. nasin sona la nimi Apis Mellifera li tawa ona.

pipi ni li sona pali e tomo lon kasi, anu lupa ma, anu ijo ante. ona li ni kepeken ijo ko: selo pipi la lupa lili li pana e ona. pipi li sijelo e ko kepeken noka mute tawa selo tomo. tomo ni li ken awen seli pona e kulupu ale, li ken poki tawa ijo moku ona; kin la pipi mama en pipi lili li lon insa. kulupu ale la meli wan li mama; ona taso li ken pana e pipi sin. pipi ante la mute suli li meli: ona o alasa o pali. mije li mute ala a: ona o unpa taso e mama ante.

sijelo pipi li sike lili tu wan: ni li monsi, li insa, li lawa. pipi li meli, la palisa kiwen li lon monsi. pipi li pana e ni lon tenpo utala… taso ni li pakala moli e ona sama! sike insa la lipu lili li lon poka tu: ona li sama luka waso, li ken mu mu mu e sijelo ale tawa sewi. ni la luka li wile awen tawa mute a lon tenpo lili a, tan sinpin tawa monsi; tawa ni li pana anpa e kon lon nasin sike, la kon li awen sewi e pipi.

lawa la sike lukin tu li lon, li suli wawa: pipi li ken lukin lili e poka monsi ona, kepeken tawa lawa ala! wawa ni li tan nasa: lon la lukin pipi li tu ala a. sike tu la selo li tan lipu lili mute. lipu lukin ni li ken e kule mute, e kule sin nasa a lon poka laso: pipi en jan ala li ken lukin e ona. pipi li lukin e kule ni lon kasi lili, la ona li kama pilin: telo suwi li lon insa!

kule la kasi li toki e ni tawa pipi: uta pipi o pana e linja suli lon insa kasi. ni la pipi li ken moku e telo. taso moku li awen ala weka: lon tomo ona, la pipi li ken weka uta e suwi tan insa sijelo. pipi poka ona o insa sin e suwi, o pana sama tawa pipi ante. esun sijelo mute li ante e telo: ona li kama sama ko. ni suwi o lon poki lili: lete li lape e kasi moku, la moku poki o ken awen e kulupu ale.

ko ni li suli mute tawa jan: pilin suwi wawa a li tan ona! ni la jan li alasa pakala open e tomo. pipi insa ale li kama sona, li tawa ona suli, li nena mute e sijelo jan kepeken palisa monsi. nena ni li utala a - taso ona li wile moli e kulupu jan, la kulupu pipi o mute suli nasa a. mute la jan li kama jo e ko tan ona moli.

pona la moli suli li lon ala tenpo ale. ma mute la jan li kama pali e tomo sin, li kama e kulupu pipi tawa ona. alasa ko li awen wile e pakala tomo… ni la jan o pali ante e ona! nasin ni li lon tomo sin mute: ijo poki li awen e lipu supa anu lipu sinpin. pipi li ken tawa insa, li ken awen e suwi lon lipu jan. jan alasa o weka taso e lipu tan insa poki, o weka ilo e ko tan selo lipu. nasin pona a! ni la pipi en jan kin li ken moku e suwi: ko la mute pona li lon!