ma ale la kasi mute li lon. kasi kule li pona tawa lukin. kasi pan li pana e moku. kasi telo li lon noka pi telo suli. kasi kiki¹ li awen e telo lon ma seli. kasi anpa li len e selo ma. taso kasi ni ale la kasi palisa lon ma Kaliponja li suli mute. ona li sewi. ona li awen lon tenpo suli. nimi ona li "kasi palisa loje."

kasi palisa loje (toki Lasina: Sequoia sempervirens) li kasi pi sewi nanpa wan lon ma ale. ona li ken sewi sama tomo palisa pi supa mute luka luka luka. taso kasi palisa loje li lon ma lili taso lon poka pi telo Pasipi lon ma Kaliponja. ni li tan seme?

ma Kaliponja la kon telo li lon. ni li pona tawa kasi palisa loje. sina tawa ma tomo Sanpansiko la sina ken lukin e kon telo walo suli. ona li kama tan seme? nanpa wan la telo Pasipi li lete. telo lete li kama tan ma Alaka li lete e telo noka. tenpo seli la kon tawa li tawa e telo selo. ni la telo lete li kama sewi li lete e selo pi telo Pasipi. nanpa tu la kon tawa seli li kama. kon ni li tawa poka sewi pi telo lete. tan ni la ona li kama lete. telo lon kon ni li kulupu li kama sike telo lili. ni li kon telo. ona li lete; taso kon pi poka sewi li seli. ni la kon seli li poki e kon telo lon poka pi selo ma. tan ni la kon telo mute li lon poka telo pi ma Kaliponja. taso tan seme la kon telo ni li suli tawa kasi palisa loje?

kasi palisa loje li wile suli e telo. lon la kasi ale li wile e telo. linja pi noka kasi li lanpan e telo tan ma. telo ni li tawa lon insa sijelo kasi tawa lipu. pini la lipu kasi li pali e wawa kepeken telo, kepeken suno, kepeken kon. kasi ale li wile e wawa ni tawa kama suli. ni la telo li suli mute tawa suli pi kasi ale. taso kasi li kama sewi la lipu li kama weka tan linja noka. ni la telo li ken ala tawa lipu. ike! kasi palisa loje li ante. ona li lanpan e telo tan kon. kasi pi mute lili li ken ni. seme la kasi palisa loje li kepeken telo kon?

kasi palisa loje li moku e telo tan kon kepeken nasin tu wan. nanpa wan la ona li jo e “lipu telo.” mute la lipu kasi li pali e wawa kepeken suno. kasi palisa loje li jo e lipu ni. taso ona li jo e lipu ante kin. lipu ante ni li pali e wawa lili li lanpan e telo mute. tan ni la ona li lipu telo. nanpa tu la, selo kin pi kasi palisa loje li ken lanpan e telo. kasi ale la telo li ken tawa lon insa sijelo. taso kasi mute la telo li ken ala tawa insa tan selo. ante la selo pi kasi palisa loje li ken tawa e telo. telo li lon selo la ona li ken tawa insa. wawa! nanpa tu wan la kon telo li tawa anpa. kon telo li kama lon kasi palisa loje la ona li kulupu. telo ni li kama anpa tawa supa ma. linja noka pi kasi palisa loje li ken lanpan e telo ni. kama la telo ni li tawa lon insa sijelo kasi tawa lipu suno.

ale la tenpo li tawa; taso kasi li awen. ona li awen lon seli lon lete, lon suno lon telo, lon open lon pini. suli nanpa wan la kasi palisa loje li awen lon kon telo pi ma Kaliponja.

¹ kiki la selo kasi li jo e palisa lili. ijo li luka e palisa la palisa li pakala e ona.