tenpo pini mute la, jan li toki e ni: soko en kasi li sama. ni li lon ala, taso jan mute li awen toki e ni. sona soko li lili lon tenpo ni! tan ni la, mi wile toki e ni tawa sina: soko li seme?

lukin la soko li kili lili. kili mute li linja tan anpa li supa sike lon sewi. taso, kili li soko ale ala! soko li suli a lon insa ma. kili li lon selo taso.

open la soko li ijo lili. ona li pana e linja walo tawa ale pi insa ma. linja li pana e moku tawa ijo, li ken mama e soko sin. taso, mute la, soko li pana e kili tawa selo ma. kili li suli la, ona li pana e kon ko. kon ni li jo e sike mute lili lili a li mama e soko sin.

kili li ken sijelo ante mute. ona li ken supa lon linja, li ken sike, li ken supa lon sinpin, li ken ko... sama la kili li ken kule ale. soko mute la sina moku e ona la sina moli. soko li ni tan ni: ona li wile awen. ante la soko mute li pona a tawa sijelo! sina wile lon sijelo wawa la o pana e soko pona tawa moku ale. soko seli li suwi tawa uta.

sama kasi ala la, suno li ike tawa soko. ona li wile e telo e pimeja. ni la, soko li moku e seme? soko mute li moku e ijo moli. soweli anu kasi li moli la soko li tawa sijelo ona, li moku e ona li weka e ona. kasi ale li loje li moli, li tawa anpa ma la, soko li moku e ona ale! soko li lon ala la ijo moli li weka ala. soko li ken moku ante kin; soko nasa li utala e pipi li moku tan ona.

soko ante en ijo ante pi soko ala li wan li pana e pona tawa ona ante tan moku. sina lukin e kiwen la ijo supa lili jelo li ken lon; ijo ni li soko li kasi! kasi li pana e moku tawa soko la soko li awen e kasi. pini la, kasi li toki tawa kasi ante kepeken linja walo soko.

ma mi la soko li suli a tawa kulupu. ma pi jan ala la kili soko li mute. jan li alasa e ona, li seli e ona li moku lon kulupu. ma lete la kili li mute ala, taso sina ken ala lukin e soko la soko li awen lon. soko li lon ala la, ijo ala ante li ken lon. soko li suli!