kulupu Kasi (Khasi) - nimi musi a - li kulupu lon ma Palata. ona li lon tenpo suli. kulupu mi la kulupu ona li ante mute. kulupu mi li pakala e ma tan mani. kulupu ona li awen e ma.

kulupu ale li jo e toki pi open ma. kulupu Kasi la jan sewi li pali e kulupu mama luka luka luka wan. kulupu luka tu tu li lon ma sewi. kulupu luka tu li lon ma. jan li ken tawa sewi li ken tawa anpa kepeken kasi suli lon nena suli. taso jan ma li pakala e kasi ni. ike a! kasi ala la jan ma li ken ala tawa ma sewi. jan sewi li ken ala tawa ma anpa. mi la toki ni li jo e kon wawa: jan o pakala ala e kasi tan ni: ona li pakala e kasi la ma li kama ike. kasi li moli la soweli li moli la jan li moli. ale ni la kasi ale li suli tawa jan Kasi.

kulupu mute la jan mije li lawa e kulupu. kulupu Kasi la jan meli li lawa e kulupu mama ona li jo e ma. taso kulupu pi ma tomo la jan mije li lawa. jan mije en jan meli li kama wan la jan mije li tawa tomo mama pi jan meli. kin la mama meli li moli la jan lili meli li kama jo e ijo ona. ma Palata la jan li toki e ni: jaki ala li lon ma tomo pi kulupu Kasi. ona li weka e jaki ale. pona a!

tenpo ni la sina sona e ni: kulupu ni li pona. kasi li pona tawa ona. taso mi wile pana e sona wan kin. ma pi kulupu Kasi la nasin telo li lon. jan li wile tawa lon nasin lon sewi telo. tenpo pini mute la ken la jan wan li pilin e ni:

a! kasi ni li wawa a. mi ken pakala e ona li ken pali e nasin lon sewi telo kepeken ona. taso mi pakala e ona la nasin ni li kama pakala kin lon tenpo kama a. ni la mi wile ala pakala e kasi. mi wile pali e nasin kepeken kasi moli ala. ni la kasi en nasin li awen pona.

lon a! tenpo pini mute la jan Kasi li open pali e nasin kepeken kasi. ona li kepeken ala e palisa tan sewi kasi. ona li kepeken e noka kasi. mute la noka ni li lon ala ma li lon kon. noka ni li kiwen ala. ona li sama linja. ona li kama suli la ona li kama palisa li kama kiwen a. mute la jan li wan e noka kasi mute.

jan li pali e nasin lon telo kepeken nasin mute. nanpa wan la ona li kepeken taso e luka. nanpa tu la jan li kepeken e palisa. ona li pana e palisa sama supa. noka kasi li ken kama suli lon poka ona. noka li suli la jan li ken weka e palisa. kin la jan li kepeken e palisa suli. palisa suli la jan li pana e noka kasi lon insa ona. ni la palisa suli li awen e noka. palisa li kama pakala la noka li ken moku e ona. nanpa tu wan la jan li pali e nasin kepeken palisa anu kiwen. nasin li pini la ona li pana e noka kasi lon ona. ni la jan li ken pali e nasin lon tenpo lili. kin la jan li ken weka e nasin open lon tenpo kama.

nasin kasi ni li ken suli! nasin wan suli li suli sama jan 32 (li suli 53 lon nasin Metre). kin la ona li awen lon tenpo suli. jan li sona ala e ni: nasin li lon tenpo sike pi mute seme. taso jan sona li toki e ni: nasin ni li ken awen lon tenpo sike luka ale (500)!