jan Eja Nasi o: jan Nani li pana e toki ni:
sina kama la, sina toki e ni tawa mi: "mi pana e kiwen leko mani loje pi pona mute tawa jan Kimi Sin lon kama ona." taso sina weka lon pini toki la sina pali sama ala toki sina. sina pana e leko pi pona ala tawa jan kama mi Si Sin li toki e ni: "sina wile jo e ona la o jo e ona, sina wile ala jo e ona la o weka a!"

sina ike pi mute ni tawa mi la mi jan pi suli seme tawa sina? mi pana e mije pona sama mi tan wile jo pi poki mani mi tawa tomo sina, taso sina weka sin e ona li pana ala e mani mi. ona li tawa mute lon ma ike tan ni, la sina ike ale tawa mi. jan ante li esun tan ma Temun la ona seme li ni tawa mi? sina taso li pana e ike mute tawa jan mi a! mi pana ala kin e kiwen mani walo pi suli Mina wan taso la sina pilin e ni: sina ken toki ike sama ni. taso mi pana e kiwen mani loje kin pi suli Teki 1080 tawa tomo suli lawa li toki e ni: "jan Eja Nasi li pana e ni." kin la jan Sumi Apun li pana e mute sama li toki sama. ijo pona ante la mi tu li toki sitelen e ona lon kiwen li awen e ona lon tomo sewi Sama.

mi ni ale la sina awen ike tawa mi tan seme? sina awen jo e poki mani mi tan ala wile mi lon ma pi jan ike, la o pana sin e ona ale.

o sona e ni: tenpo kama la kiwen mani loje li pona mute ala la mi wile ala e ona. kama la mi wan li lukin e leko ale li kama jo e leko pi wile mi lon ma mi. mi kama ken a wile ala e ijo sina tan ni: sina ike mute tawa mi.

toki ni li kepeken pali pi jan A. Leo Oppenheim lon lipu ni Letters From Mesopotamia: https://isac.uchicago.edu/research/publications/misc/letters-mesopotamia-official-business-and-private-letters-clay-tablets