lipu tenpo li jo e lipu Patreon! o kama sona e ni!

lipu tenpo logo

lipu tenpo

musi palisa

jan jan Masine tenpo 2023-08-24 lipu nanpa sewi sona sona

tenpo pini la mi tawa ma Somi (Suomi). tenpo open la mi sona lili e ma Somi, taso mi kama sona mute tan ona lon tenpo mi pi ma ni. tenpo suno wan lon tenpo lete la mi lukin e ijo. ona li pona lukin li nasa lukin tawa mi. ijo ni li jo e sinpin mute. jan li pali e ona tan palisa kasi tan linja. mi sona ala e kon ona. mi toki e ni tawa jan pona mi: “ijo ni li seme?”

ona li toki e ni: “toki Somi la ni li ‘himmeli’. jan li pali e ona lon tenpo lete tan ni: ona li pona tawa ona. taso tenpo pini la ona li pali e ona tan ni kin: ona li pilin e ni: musi ni li tomo tawa kon kasi. kon kasi li lon tomo ni la ona li pilin pona li pana e kasi mute tawa jan lon tenpo sike kama.”

mi toki e ni tawa jan pona mi: “ona li pona lukin. mi wile pali e ona kin”. jan pona mi li toki e nasin pali tawa mi. mi pali lon poka ona. sina wile pali e ijo ni kin la o lukin e nasin lon anpa pi toki ni. (nasin ante li lon. wile sina la sina ken pali e ijo palisa pi sijelo ante mute, taso lon ni la mi toki tan nasin wan pona taso tawa ni: jan li ken pali e ijo palisa lili.)

pali nanpa wan: o alasa e palisa. kasi tan ma telo la palisa ona li pona tawa ni. taso sina ken kepeken kasi lili tan ma sina. ona o jo e lupa lon insa ona. sina wile ala anu ken ala kepeken palisa kasi la o kepeken palisa pi sijelo ante. sina kepeken e palisa kasi la o awen e weka telo tan palisa sina. ni li ken wile e tenpo suli.

pali nanpa tu: o kipisi(pu) e palisa. ni la sina kama jo e palisa luka luka tu pi suli sama. (jan li toki e ni: nanpa palisa li luka luka tu tan ni: mun pi nanpa sama li lon sike suno.)

pali nanpa tu wan: o jo e linja suli. o linja e palisa tu wan.

pali nanpa tu tu: o wan e palisa nanpa wan e palisa nanpa tu wan. ni la sijelo pi sinpin tu wan li lon. ona li ni lukin:

0023sewi_musi_palisa-2.jpg

tan jan Masine

pali nanpa luka: o linja e palisa tu o pali e sijelo sin pi sinpin tu wan lon linja palisa. ona li ni lukin:

0023sewi_musi_palisa-3.jpg

tan jan Masine

pali nanpa luka wan: o awen pali e pali nanpa luka tawa tenpo ni: sina jo e sijelo luka pi sinpin tu wan en sina jo e palisa wan taso lon linja ala. pona la linja sina li jo e lukin ni:

0023sewi_musi_palisa-4.jpg

tan jan Masine

pali nanpa luka tu: o linja e palisa sin o wan e ona tawa open linja.

0023sewi_musi_palisa-6.jpg

tan jan Masine

pali nanpa luka tu wan: ma tu la palisa tu taso li linja. o linja sin e pini sijelo ona. sina kama jo e musi palisa lili!

0023sewi_musi_palisa-1.jpg

tan jan Masine

wile sina la o ken pali e sijelo ni mute pi suli ante mute o wan e ona. musi pona!

0023sewi_musi_palisa-5.jpg

tan jan Masine