jan ale li wile e tomo. jan li awen lon tomo la telo sewi li ken ala moli lete e ona. pipi li ken ala pana e jaki moli tawa ona. moku ona en len ona en mani ona li ken awen lon tenpo suli. tomo la ona li ken weka pona e jaki tan sijelo ona tan len ona. tomo li suli a tawa jan. kulupu olin li ken lon tomo wan. mama en jan lili ona kin li ken lon tomo wan.

ma ale la jan mute li lon. ona ale li wile e tomo la tomo mute a li wile. taso tomo o suli seme? tomo o mute seme?

ken la tomo ale o jo e kulupu wan taso. insa pi tomo tu la, ma kasi o lon. ni li ken pona. tomo ante li lon weka la jan li ken kalama wawa, li pakala ala e kute pi jan ante. jan li jo e soweli la soweli li ken musi lon ma poka. tomo wan li kama pakala tan seli la tomo ale ante li lon weka lili la seli li pakala ala e tomo ante. nasin ni li pona ale anu seme?

tomo pi kulupu wan taso li ken ike kin. tomo ale li jo e kulupu wan taso la ni li wile e tomo pi mute wawa. tomo ale li wile e ma poka la kulupu tomo li wile e ma suli. ma mute o supa tomo la jan li ken ala pali e moku lon ma. sina tawa lon nasin la sina lukin e tomo sama a lon tenpo suli. jan li wile esun e ijo la esun li lon weka.

tomo pi kulupu wan taso li ike e nasin tawa. tawa jan li wile e ilo e mani. jan ale li open e tawa ona lon tomo la ona ale li wile e ilo tawa. ilo tawa li kama mute. ilo ale li lon nasin la ilo ale li kama ken ala tawa pona. tawa ale li kama wile e tenpo suli. kin la ilo mute li pana e kon jaki li moli e kasi e waso e soweli. pakala.

ken la tomo o jo e kulupu mute. tomo suli o jo e tomo mute lili pi kulupu wan. jan mute li lon poka la nasin tawa li kama wawa. jan mute li kama ken tawa kepeken ilo suli wan. jan mute li tawa kepeken ilo lili anu noka taso la esun mute li open lon poka nasin li kama wawa.

tomo suli la ike seme li ken? jan mute li lon poka la ni li ken ike e pilin jan. jan li ken ala sona pona e jan mute. sina lukin e jan lon tenpo mute li sona ala e ona la ona li ken pana e pilin monsuta lili tawa sina. ken la ona li wile tawa tomo sina li wile kama jo e mani sina!

pakala mute li ken tan kulupu lawa. ilo suli tawa li kama taso tan pali pi kulupu lawa. kulupu lawa li pali ike la ken la ilo ala li lon. jan ala li ken tawa tomo pali ona. pakala. sama la kulupu lawa li weka ala e jan pi wile pakala la tomo suli li ken kama jaki tawa lukin li ken kama wawa e pilin monsuta.

lon la nasin tu tomo li ken pona li ken ike. sina lon tomo la tomo sina li suli ala suli? pilin sina li seme tawa tomo sina? sina wile ala wile lon tomo pi nasin ante? kulupu lawa sina o suli ala suli e tomo?