o jo e poki lon luka sina. poki li poki la, ijo li ken lon insa ona. sina lon ala insa ona la, sina ken lukin e selo ona pi insa ala. sina open e ona la, sina ken lukin e insa ona. insa en insa ala li ijo tu lon poki.

taso poki wan li ante a! jan li pali e nasin nanpa la, nasin nanpa li kama e poki nasa ni. pipi li lon selo ona, li awen tawa la, pipi li kama lon insa poki, li kama lon insa ala poki, li kama sin lon open pi tawa ona. insa en insa ala li sama, li wan lon poki ni. seme la, ni li ken? lon la, mi en sina la, poki ni li ken ala.

sina jo e lipu la, sina sitelen lon ona la, suli sitelen li tan anpa tawa sewi, li tan poka wan tawa poka ante. sitelen lipu li suli pi nasin tu.
sina jo e poki lon luka sina la, sijelo ona li sama sijelo sina: suli pi sijelo sina li tan anpa tawa sewi, li tan monsi tawa sinpin, li tan poka wan tawa poka ante. sijelo sina li suli pi nasin tu wan. poki pi luka sina li suli pi nasin tu wan. taso sijelo ale a li sama ni. taso poki nasa pi toki mi li suli pi nasin tu tu. nasa: suli ona li tan anpa tawa sewi, li tan monsi tawa sinpin, li tan poka wan tawa poka ante... li tan nasin ante wan tawa poka ante pi nasin ante ni. nasin seme? ni li nasa ona, ona li kepeken nasin ante wan, li sama ala ijo lon. jan li pali e ijo nasa tawa sona pi nasin nanpa.

ni la, ijo li lon insa lawa taso pi jan sona anu seme? sina a ken ala ken sona e poki nasa? ona li sama seme tawa lukin? mi wile pana e ken, taso open la, mi o pana e sona pi ijo ante.

o jo e lipu. sina lukin e sinpin ona la, sinpin lipu li walo. monsi lipu li pimeja. suli ona o suli tan anpa tawa sewi o lili tan poka wan tawa poka ante. ni la ona li sama linja anu palisa li sama ala ma. o wan e sewi lipu e anpa lipu: o jo e sewi lipu, o tawa e ona tawa anpa lipu, o sike lili e ona tawa anpa. sewi lipu la, sina lukin e pimeja. walo li lon anpa. o wan e walo pi sewi lipu ni lon walo pi anpa lipu. sina kama pali e sike pona kepeken lipu. sike taso. nasa ala. pipi li tawa lon selo insa pi sike lipu ni, li awen tawa la, ona li awen lon insa. ona li tawa lon selo pi insa ala li awen tawa la, ona li awen lon insa ala. nasa ala a.

ni la o pali e ijo nasa. o jo e lipu. sama la lipu o sama linja. o wan e sewi lipu e anpa lipu, taso o kepeken nasin ante: o jo e sewi lipu. o tawa sike e luka sina: o anpa e sewi luka, o sewi e anpa luka. tan ni la, sina lukin e pimeja lon sewi lipu e walo lon anpa lipu. sewi lipu la, walo li lon monsi. insa lipu la, lipu li tawa sike li kama ante tan walo tawa pimeja. o tawa e sewi lipu pimeja tawa anpa lipu. o sike lili e ona tawa anpa. o wan e pimeja pi sewi lipu lon walo pi anpa lipu. ni kin la, sina kama pali e sike kepeken lipu - taso ona li nasa lili. pipi li open e tawa lon insa pi selo sike lon poka sina la, ona li awen tawa la, ona li kama sin lon poka sina - taso ona li kama lon insa ala pi selo sike. ona li awen tawa la, ona li kama sin lon poka sina lon insa lon open pi tawa ona. jan Mepiju (Möbius) li kama sona e sike nasa ni.

jan Kalin (Klein) li kama sona e poki pi toki open mi: o jo e sike tu pi jan Mepiju. pini lipu pi sike ni wan li kama lon pini lipu pi sike sama la, ona tu li wan, li ijo sin. ijo sin ni la pini tu li kama wan la, ni li poki nasa pi jan Kalin. o sona: sina wile ni kepeken lipu sina la, sina ken ala a! lipu li wile kama tawa insa lipu li kama wile lupa e selo. ike la, mi pali e ijo la, ijo li suli pi nasin tu wan. poki nasa li wile e suli pi nasin tu tu li lupa ala e selo.

mi en sina la, ona li poki pi ken ala. mi wile pali e ona la, lupa li lon ona - taso ona li ijo pi lupa ala. awen la, ona li ijo musi tawa jan sona. jan pi sona nasa nanpa la poki ni li pona. ni la, ona li pali e sijelo pi sama ona. ante pi wan taso la, lupa li lon. tan ni la, insa en insa ala li lon ona. ona li ken jo e telo lon insa. jan sona pi mute ala li jo e poki ni li ken jo e telo lon insa. poki li nasa tawa lukin la, lupa li lon anpa poki. telo li wile lon insa la, anpa poki o lon sewi. ni la, telo li ken open e tawa. anpa poki li kama anpa sin tan sewi la, telo li ken awen lon insa.