sina kama jo e moku tan tomo esun la sina esun e moku lon poki. poki mute li ken. ken la poki li kiwen anu lipu, li lili anu suli. mute la jan li kepeken e poki lon tenpo wan taso. ni li ike. taso poki ni li ken kama sin. poki mute li kama sin kepeken nasin ni:

pona la sina ken awen e sike pi kama sin. sina wile weka e poki tawa poki jaki la o kute: o anu e poki jaki pona. ma mute la jan li weka ala e poki telo lon poki jaki: jan li pana e poki telo (pi telo ala) lon tomo esun. poki li kiwen la ilo li weka e jaki li pana sin e telo lon ona.

ma mi li ma Tosi. ona la poki jaki mute li lon: poki tawa jaki kasi, poki tawa jaki poki, poki tawa jaki lipu, poki tawa kiwen lukin, poki tawa ijo ante. kin la mi weka e poki telo lon tomo esun. mute a! taso nasin ni li pona tan ni: ijo ante li wile e nasin ante. mi wile pali sin e lipu tan jaki lipu la mi wile e lipu taso. ijo ante li lon jaki lipu la mi o weka e ijo ni. ni li pali suli!

jaki li lon poki pona la nasin ona li open. ona li tawa tomo jaki. tomo ni la ilo li kulupu e jaki kepeken sona tan ilo oko anu ilo ante. ilo oko li ken sona e ijo mute tan lukin: jaki li tan kiwen seme li suli seme. ilo taki li ken sona e ni: jaki li kiwen taki anu kiwen taki ante. ilo kon li pana e kon. poki kiwen li awen taso poki lipu li tawa weka. ni la ilo li ken kulupu e poki kiwen e poki lipu. pini la kulupu pi jaki wan taso o lon. jaki wan taso li lon la ilo li ken pona pali sin e ijo tan ona.

taso poki mute li tan kiwen wan li tan kiwen mute! o lukin e poki ni. selo la ona li lipu. insa la kiwen powe li lon. ken la kiwen ante li lon kin. lupa li tan kiwen powe. poki lili ni li tan kiwen mute a! ni li ike tawa sike pi kama sin: ilo o kipisi e ijo ni. mute la poki ni li lon telo. telo la lipu li pakala. lipu pakala li ken kama sin lipu. lipu ala la kiwen powe li lon. ken la kiwen powe li kama sin. taso mute la jan li seli e ona.

taso ijo ante li pona a tawa kama sin: kiwen lukin. ilo li ken weka e jaki lili e sitelen nimi tan poki pi kiwen lukin. kiwen lukin taso li lon la ilo li pakala e ona li seli e ona li pali sin e poki! mute la kiwen lukin li jo ala e kule. ken la ona li laso anu kapesi. kiwen lukin pi kule wan taso o lon tan ni: mi wile e kiwen lukin pi kule ala la kiwen laso li pakala e kule ona. ni la poki jaki tu wan li lon: poki pi kiwen laso, poki pi kiwen kapesi, poki pi kiwen pi kule ala.

kiwen lukin ala en kiwen powe ala la kiwen ante li lon. sina ken kepeken e nimi “kiwen mani” anu “kiwen ilo” tawa ona. poki la kiwen Aluminijun li lon. ona li pona mute a! jan li wile kama jo e kiwen Aluminijun sin tan ma la ni li pali mute. taso jan li ken kama jo e kiwen ni tan poki jaki kepeken pali lili a! ilo taki li ken weka e kiwen taki. ilo ante li kama jo e kiwen Aluminijun.

lipu pi jaki ala li pona kin. taso mute la jaki li lon poki lipu. jaki li tan moku anu telo. ni li pakala e lipu. jaki ala li lon la lipu li pakala lon telo. ilo li ken pali e lipu sin tan “telo lipu” ni.

taso nasin ni ale li ken lon taso tan ni: jaki o lon poki jaki pona! ni la o pana e jaki lon poki ona! kulupu ma Elopa la poki ale la poki mute mute mute luka li kama sin. kulupu ma Elopa li jo e lawa wan tawa sike pi kama sin. ma Mewika la lawa wan li lon ala. ona la poki (pi kiwen powe) mute luka luka li kama sin. suli la ma mute lon ma Elopa en ma mute lon ma Asija (ma Sinkapo, ma Tawan, ma Nijon, ma Anku) li wawa li pona tawa sike pi kama sin.