tenpo ale la jan li sitelen e lipu musi lili.
lipu ni la, linja mute li pini kepeken kalama sama.
kin la nanpa kalama li suli lon lipu ni.
toki pona la, lipu musi ni li lili.
leko nimi li suli mute lon toki pona. taso, sitelen pi sijelo pi toki ante li nanpa lili lili.
mi wile toki e sitelen musi Soneto tawa sina.
sitelen musi ni li kama tan ma Italija, li musi mute tawa mi, tawa jan mute.
jan Jakopo tan ma Lensini (Jacopo da Lentini) li open e nasin sitelen ni lon tomo lawa pi jan lawa suli Peteliko nanpa tu lon ma Sisilija (Sicily).
lon tenpo pini la, jan mute pi ma mute li open e sitelen lipu Soneto. sijelo mute pi sitelen Soneto li kama lon. mi wile toki e lipu Soneto kepeken nasin pi jan Petalaka (Petrarch).
sina wile sitelen e lipu Soneto ni pi tenpo pini la, o sona e lawa ni:

lawa ale pi sitelen musi Soneto pi ma Italija

lawa pi linja nanpa li ni: lipu musi ni li jo e kipisi nanpa tu tu. kipisi nanpa wan en kipisi nanpa tu li poki e linja nanpa tu tu, taso kipisi nanpa tu wan en kipisi nanpa tu tu li poki e linja nanpa tu wan.
lawa pi kalama nanpa li ni: linja ale li poki e kalama nanpa luka luka wan.
lawa pi kalama pini li ni:

• lawa lili nanpa wan: linja nanpa wan en linja nanpa tu tu o kalama sama lon pini.
• lawa lili nanpa tu: linja nanpa tu en linja nanpa tu wan o kalama sama lon pini.
• lawa lili nanpa tu wan: linja nanpa luka en linja nanpa luka tu wan o kalama sama lon pini.
• lawa lili nanpa tu tu: linja nanpa luka wan en linja nanpa luka tu o kalama sama lon pini.
• lawa lili nanpa luka: linja nanpa luka tu tu en linja nanpa luka luka tu o kalama sama lon pini..
• lawa lili nanpa luka wan: linja nanpa luka luka en linja nanpa luka luka tu wan o kalama sama lon pini..
• lawa lili nanpa luka tu: linja nanpa luka luka wan en linja nanpa luka luka tu tu o kalama sama lon pini..
• lawa lili nanpa luka tu wan: kalama pi lawa lili nanpa wan en kalama pi lawa lili nanpa tu wan o sama.
• lawa lili nanpa luka tu tu: kalama pi lawa lili nanpa tu en kalama pi lawa lili nanpa tu tu o sama.

sina ken kama sona e ni la sina ken kepeken e toki ni "aiia-aiia-oue-oue". sina ken awen e sona ni kepeken toki ni: "ali li kama lili la o kute! moku ken"

taso, sina sitelen e toki pona la, lawa mute ni li ike. mi wile pana e lawa ante ni tawa sina:

• lawa ante pi lawa lili nanpa luka tu wan: sitelen pi lawa lili nanpa wan en sitelen pi lawa lili nanpa luka li sama.
• lawa ante pi lawa lili nanpa luka tu tu: sitelen pi lawa lili nanpa tu en sitelen pi lawa lili nanpa luka wan li sama.
• lawa sin: wan pi lawa ni li ken lon.

kepeken nasin ni la, toki musi musi li ken kama lon. sina wile toki e pilin suli, e pilin seli, e ma kasi, e telo tawa, e ijo nasa la sina ken pali e sitelen musi Soneto.

mi wile pana e toki wan ni tawa sina.

jan musi pona, o toki e nasa

seme li sitelen lon sinpin telo?
seme li kule musi e oko jan?
seme li pana e seli lukin wan?
seme li lete e ko lili walo?

seme li suno e mun suli jelo?
ma ni la, seme li namako e pan?
seme li pakala sin e jaki tan
ni: jan li wile ante e sijelo?

sina pali ala pali e musi,
e kasi pimeja, e leko sike?
sina lukin ala lukin e insa?

o toki e kalama ala kasi,
e nena lupa ma, e pona ike.
jan musi pona, o toki e nasa.

lon lipu musi ni la mi kepeken e lawa sewi, taso jan li ken kepeken e lawa ante kin.

sina olin ala olin e sitelen musi Soneto? sina olin mute e sijelo ni anu seme? o pana e toki insa sina!