tenpo sike 1548 la, lon ma tomo Napoli la, jan Jotano Puno (Giordano Bruno) li kama lon. jan Jotano Puno li kama suli la, ona li kama sona e nasin sewi, e nasin isipin². ona li tawa mute lon ma Elopa.

tenpo pimeja la, lukin sewi la, jan Jotano Puno li kama jo e sona ni: nanpa wan la, ma sewi li jo ala e pini. nanpa tu la, sike suno mute pi ma sewi li lili ala, li suli sama sike suno Sola, taso ona li lon weka mute. ken la, sike suno mute li jo e mun. ken la, konwe¹ li ken lon selo mun. jan Jotano Puno li toki insa e ni: ma ante mute li lon ma sewi.

ike la, sona sin pi jan Jotano Puno li awen ala lon insa lawa ona. jan Jotano Puno li wile e ni: jan ante li kama sona e isipin sin. jan Jotano Puno li toki e sona ona, li sitelen e sona ona. taso kulupu lawa pi nasin sewi Katoli li pilin ike tan sona sin, li wile e ni: jan Jotano Puno li pini toki. ni la, kulupu lawa li lawa e ni: jan Jotano Puno li awen lon tomo awen. tenpo sike 1600 la, jan li seli e jan Jotano Puno lon ma tomo Loma (Roma), kepeken seli pi palisa kasi. ni la, jan Jotano Puno li moli.

tenpo kama la, jan Kalijo Kalije (Galileo Galilei) en jan Jowane Kepa (Johannes Kepler) en jan Isake Nuton (Isaac Newton) en jan sona ante li pali e sona sin. kulupu lawa pi nasin sewi Katoli li pilin pona ala tan sona ona, taso li moli ala e ona.

jan mute li awen wile sona e ni: ma ante mute li lon ala lon ma sewi ? konwe li lon mun mi, taso konwe li lon ala lon mun ante? sitelen tawa mute li toki e ni: konwe li lon mun ante. taso jan sona li sona ala.

tenpo sike 1995 la, jan Mike Mejo (Michel Mayor) en jan Tite Kelo (Didier Queloz) li pali e sona sin: sike suno pi nimi "51 Pegasi a" li jo e mun! pona la, jan sona mute li isipin e nasin lukin sin li pali e ilo lukin sin : ilo lukin Kepa (Kepler) en ilo lukin Tese (TESS) li kama lukin e mun sin mute.

tenpo sike 2025 la, jan li sona e mun ante mute : nanpa pi mun ni li sama 5600. mun li ken seli anu lete, li ken suli anu lili, li ken tawa sike wawa anu lili. ken la, konwe li lon mun wan! jan sona li isipin e ni: mun pi konwe mute en mun pi konwe ala li jo ala e kon sama. ken la, ilo lukin li lukin e kon la, jan li ken sona e ni: konwe li lon ala lon mun wan.

mi wile sona e ni: jan li alasa e konwe sin la, mi moli ala moli? mi wile e ni: mi moli ala, mi ken sona e konwe sin!

¹ konwe: soweli en pipi en kasi li konwe, taso kiwen en ma en telo li konwe ala.

² isipin: pali pi insa lawa.