toki mute li lon ma. mi wile toki e toki la mi kepeken nimi ona. mi pana e nimi Toki e nimi Inli la sina sona e ni: mi toki e toki Inli e toki ante ala. nimi Inli en nimi Tosi en nimi Kanse en nimi Sonko en nimi ante mute li ken e nasin ni. taso toki pona la seme? toki mute li pona tawa mi. ona ale li toki pona anu seme? nasin seme la mi o toki e toki pona wan taso?

ni li nasa tawa jan mute. “nimi ala li pana e toki pona! pakala suli a! toki pona o nimi.” ona li ante lili e toki ona. mi toki pona la ona li toki Toki Pona. anu la ona li toki Pona. anu la ona li toki Tokipona. mi la nasa ike. toki Inli la nimi Toki Pona li lon li pana e toki wan taso. toki pona la ala. ni li nasa anu seme?

mi la nasa ala a! tenpo mute la ijo li suli tawa kulupu la ijo ni li jo ala e nimi. o lukin e lipu pi ma ale. ma Apika la ma seli suli li lon. toki Inli la nimi ona li ma Sawala. toki Alapi la seme? toki Alapi la nimi Sawala li toki e ma seli. taso ma seli ale a li kepeken nimi Sawala! toki Alapi la ma Sawala li ma seli suli. nimi ala li toki e ma Sawala taso.

o lukin kin e ma Oseja. ma Oseja la kulupu Mulinpata li lon. kulupu Mulinpata li toki Inli li toki Mulinpata. nimi Mulinpata li pana e toki wan taso lon toki Mulinpata anu seme? ala. nimi Mulin li nimi Toki lon toki ona. nimi Pata li nimi Pona. ni la ona la toki ona li toki pona. sama kulupu mi a.

sina kama sona e ni: nasa ni li kama lon toki ante. ni li ike ala tawa kulupu ona. taso toki pona la mi o seme? ken la tenpo la mi wile toki e ike pi toki mi. taso nimi ona li toki pona. mi toki e ike pi toki pona la ni li nasa wawa tawa jan kute. nasin seme la mi ken tu e kon pi toki pona (ale) e kon pi toki pona (ni taso)?

o lukin e toki mi. toki Inli la ni li Toki Pona. taso mi la ni li toki mi a. kin la ona li toki lon sitelen ni. kin la ona li toki pi lipu tenpo. sina lukin e toki mi la sina sona. mi toki e toki wan taso. nasin pona.