tenpo pimeja nasa

tenpo pimeja li tan seme? sina sona: suno li kama lon anpa ma. lon la, ma a li tawa li kama len e suno. tenpo pimeja ale la, ma li len e suno. anu seme? tenpo poka la, mi lukin e tenpo pimeja nasa: mun li len e suno.

mi lukin e ni lon kulupu jan pi toki pona. suno li lon sewi la, mun li kama lon sinpin ona kepeken tenpo suli, li len e ale ona lon tenpo lili taso. tenpo lili ni la sewi li kama pimeja; la mi kama ken lukin e mun lili lon poka ale sewi. kin la mi ken lukin e sike suno nasa: ni li selo suno; sina ken ala lukin e ona lon tenpo ale tan ni: insa suno li wawa a tawa selo.

poka ma mi

mun li len e suno la, jan li ken ala ken lukin e ni lon ma ale? ken ala. mun li pana e pimeja tawa ma lili taso. sina wile lukin e len pi ale a suno la, ma lili a li pona tawa ni.

tenpo pini la, mi kama sona e ni: tenpo ala pi lon mi la mun li len e suno ale tawa ma mi. ni li tan seme? lon la, tan pona li lon ala. mun li len e suno tawa ma mi lon tenpo pini lon tenpo kama. len suno la mun li pana e pimeja lili taso; kin la ma mi li lili. pimeja lili en ma mi lili li lon ala ma sama lon tenpo sama la ni li nasa ala. taso, mi ken toki e ni: lon la, len suno ni li mute lili lon poka ma mi.

poka ma mi li seme? o lukin e ma ale. sina ken sitelen e linja suli wan lon insa: ona li sike pi seli nanpa wan. o tu e ma ale lon linja ni. sina kama jo e poka tu ma. poka wan la, jan en ma li mute, telo li lili tawa poka ante. poka ante la, jan en ma li lili, telo li suli. mi tan poka pi jan lili.

len suno li mute ante lon poka ante

ma li sike e suno la, ona li weka seme tan suno? mute a. taso, weka ni li sama ala lon tenpo ale. sike wan la, weka li suli nanpa wan lon tenpo wan, li lili nanpa wan lon tenpo wan ante. weka li suli la ma li lete; weka li lili la ma li seli – anu seme? ala a! tenpo lete en tenpo seli li tan ijo ante. ken la sina sona e ni: poka ante ma li lete lon tenpo ante li seli lon tenpo ante.

poka ma mi la, tenpo seli li tenpo ni: ma li poka nanpa wan tawa suno. poka ante la, tenpo seli li tenpo ni: ma li weka nanpa wan tawa suno. sina tan poka ni la sona ni li ken nasa, taso ona li lon.

sina wile lukin e len suno la, ijo seme li pona? nanpa wan la, sina wile ken lukin e suno lon tenpo suli – li wile e tenpo suno suli – tan ni: len suno li ken lon tenpo ale, la suno o lon sewi lon tenpo ni. tenpo seli li pona tawa ni; ona la tenpo suno li suli.

nanpa tu la, sina wile e ni: tawa lukin la, mun li suli tawa suno; la ona li ken len e ale suno. tenpo seme li pona tawa ni? tenpo ni: ma li weka nanpa wan tawa suno! ma li sike e suno la, lukin la suno li kama suli li kama lili (sina ken ala lukin e ante ni kepeken ala ilo, ona li ante lili). tenpo la suno li ken suli tawa mun; la mun li ken ala len e ale suno.

poka ma pi mi ala la ijo ni tu li ken kama lon tenpo sama: tenpo seli li tenpo pi weka nanpa wan kin. ma mi la, ante: tenpo seli la suno li poka li suli ike; tenpo lete la suno li lon sewi lon tenpo lili. ni la, poka ni la len suno pona li lili tawa poka ante. lon la, ante ni pi mute len li lili taso. sina lon poka ma mi la, ken suli la sina awen ken lukin e len suno lon tenpo kama (ken la sina o tawa lili tawa ma ante).

tenpo ni la, mi awen ala lon ma mi, li awen lon ma Elopa; la, mi ken tawa tenpo kulupu pi toki pona li ken lukin e tenpo pimeja nasa lon poka pi jan pona a. lon la mun li len e suno lon poka pi ma ale – mi la, kulupu pi toki pona kin o lon poka ale ma.