kulupu li kama lon ma wan lon tenpo sike ale. tenpo ni la kulupu li lon ma tomo Sijana. taso ni la seme? mi wile pana e sona ni. ken la ni li pana e wile kama tawa sina kin a!

musi kulupu

ijo musi mute li lon tenpo kulupu ni. jan mute li ante toki e musi lipu anu musi supa lon tenpo ni anu tenpo pini. mi ken musi mute kepeken toki pona tan ni. mi ale li ni lon tenpo mute. tenpo la mi sitelen kule. tenpo ante la mi pali e nasin sitelen nasa. musi suli la supa suli li lon. lon supa suli la jan li ken musi sama ni: ona li toki sama jan tan lipu pi lon ala li pana e toki tan lipu ni. tenpo kulupu ni la jan li pana musi pi lipu "tu kuntu". kin la kalama pona li lon. jan li ante toki e kalama tawa toki pona. lon la kulupu pi jan luka (mi lon kulupu ni) li pana e kalama ni tawa jan ale pi kulupu tu. mi pilin monsuta suli tan ni a a.

toki tu

wan pi kulupu toki tu kin li musi a! tenpo kulupu ni la toki tu li lon: jan li toki pona li toki Epelanto. open la ni li ken nasa lili. lipu mute lon tomo kulupu li kepeken toki Epelanto taso. jan mute li ken ala sona e lipu tan ni. taso jan pi kulupu ni li pona li suwi. kulupu tu li poka lon tenpo ale. jan pi toki Epelanto li kama sona e toki pona. jan pi toki pona li kama sona e toki Epelanto. lon tenpo pimeja la jan li pana e kalama musi la jan ale pi toki tu li musi lon poka. tenpo la mi ken ala toki tawa jan ante tan ni: ona li ken toki Epelanto taso. taso jan mute pi toki tu li lon. mi ken toki e ni tawa ona: "o ante e toki mi!" ni li ken ike lili. taso mi la ni li musi pona. jan mute pi toki pona li musi supa. jan ante li kama li wile musi. ona li ken toki pona ala. taso ona li alasa musi pi toki pona. tan pona kulupu ni la mi kama poka pi jan ante mute. lon a, mi open kama sona toki Epelanto tan tenpo kulupu ni!

musi nasa

sama tenpo ale la kulupu li nasa pona suli li pali e ijo nasa mute. musi sin li kama lon: ni li musi "sinpin monsi". jan wan li lon insa pi sike jan. jan wan ante o supa e poki telo lon sijelo ona. jan ante ale li lon sike li toki e ni: "sinpin. monsi. sinpin. monsi." ni li musi tan seme? mi sona ala. taso ni li musi a. jan li pali e nimi nasa mute. nimi ni li nasa suli la sina ken sona ala e ona. ni la jan poka sina "li sun e akuliki sulili" la sina ken sona e ni: ona li kepeken e nimi pi tenpo kulupu ni.

tenpo pona

tenpo seme li pona nanpa wan tawa mi? mi tawa ma Talakona lon tenpo suno pi len suno. jan ante luka kin li lon. len suno la jan ale li wile ma Talakona. ni la mi ken ala lon insa pi tomo tawa. jan pi mute ike li lon insa ona. tomo tawa ante li kama la jan mute li awen lon. jan ante li lon la mi ken toki li ken musi. taso seli li lili e musi ni. mi ale li moku la jan ante li kute e kalama mi li wile sona e ni: mi kepeken toki seme? ni la mi pana e sona mute pi toki pona tawa ona. ken la ona li kama sona toki pona tan ni. kulupu ni la mi musi suli li kama pilin poka pona. mi wile awen sona e musi pi kulupu ni lon tenpo ale.

tenpo kulupu ni li pona suli tawa mi. mi wile a kama lon tenpo kama li wile e ni: jan pona mute kin li lon.