lipu Linku li lipu nimi. sina ken alasa e kon pi nimi ale pi toki pona lon ona. taso seme li nimi ale pi toki pona? ni la kulupu pi lipu Linku li toki tawa jan ale e ni: toki pona la sina kepeken e nimi seme?

nasin pi lipu Linku la kule tu tu li lon. nimi li ken jo e kule wan anu kule ala. lipu Linku la nimi Inli taso li lon.

nanpa wan la nimi suli (core) li lon. nimi suli li nimi suli pi toki pona. jan mute a li sona e ona. jan mute la jan luka luka luka tu li kepeken e nimi la ona li kama nimi suli. sike ni la nimi suli ale luka luka luka tu tu li lon.

nanpa tu la nimi kulupu (common) li lon. jan mute li sona e ona. jan mute la jan luka luka tu li kepeken e nimi la ona li kama nimi kulupu. sike ni la nimi kulupu luka luka li lon.

nanpa tu wan la nimi namako (uncommon) li lon. jan mute ala li sona e ona. jan mute la jan luka wan li kepeken e nimi la ona li kama nimi namako. sike ni la nimi namako luka luka wan li lon.

nanpa tu tu la nimi lili (obscure) li lon. kulupu lili li sona li kepeken e nimi ni. taso jan ale la jan luka li kepeken e nimi la ona li kama nimi lili. sike ni la nimi lili mute luka luka luka tu tu li lon.

pini la nimi li ken jo e kule ala (sandbox). nimi musi mute li jo ala e kule. taso nimi ni li lon lipu Linku a. kulupu lili taso li kepeken e nimi ni. ken la jan ala li kepeken e nimi ni.

seme li ante?

nanpa wan la nasin li ante. tenpo pini la kulupu Linku li toki sona e ni: “sina kepeken ala kepeken e nimi suli ale?” jan mute li toki e “kepeken”. taso lon la ona li kepeken ala e nimi suli ale li sona ala. ni li ike a. taso jan li wile ala toki e sona tawa nimi ale pi toki pona (nimi suli la nimi ale luka luka luka tu li lon!). ni la sina toki taso e sona sina pi nimi mute pi nimi suli ale. jan ante li toki e sona tawa nimi mute ante. pini la jan pi nanpa suli li toki e sona ona tawa nimi suli ale.

ante ni li pona tan ni: tenpo pini la lupa nanpa suli li lon: nanpa pi nimi “ale” li MMMMLLTW (93). ona li nimi suli. anpa ona la nimi kulupu li open. nanpa pi nimi “monsuta” li MMMMTT (84). lupa nanpa ni li suli li luka tu tu! lupa ni li lon ala nasin toki pi jan pi toki pona! tenpo ni la lupa ni li weka. anpa pi nimi suli la nimi ni li lon: mu (89%), selo (89%), kin (87%), unpa (87%), monsuta (86%). lon a! tenpo ni la nimi “kin” en nimi “monsuta” li kama nimi suli.

nasin li ante. taso jan li ante kin e toki ona. nimi “pu” en nimi “ku” en nimi “su” li kama lili. ni li lon tan seme? nanpa wan la nasin li ante. ni la jan li ken toki e sona ona pi nimi “pu”. taso nimi “ku” en nimi “su” li ante kin. ante la jan li pilin e ni: nimi pi lipu wan li nimi tan seme?

mi la ante ni li pona. mi pilin e ni: nimi lipu li sama nimi jan. ni la mi ken kepeken e nasin ni kin: lipu Pu, lipu Ku, lipu Su. toki pona la nimi mute ala li lon. nimi lipu li suli ala tawa jan mute.

nimi lili la ante mute li lon. nimi ni li kama suli: puwa, usawi, mijomi, melome, omekapo, nja, te, to. nimi “ali” taso li kama lili. nimi ante la ante ni li lon: kijetesantakalu en epiku en oko li kama lili. misikeke li kama suli. ante ni ale li lili a. taso ante suli wan li lon:

kisa^[1]. kisa li kama jo e kule. tenpo pini la ona li jo ala e kule. tenpo ni la ona li lon kulupu pi nimi lili. nimi wan taso li kama jo e kule. mi la ni li suli tan ni: nimi sin li pona mute tawa mi. nimi “kisa” en nimi “puwa” en nimi “misa” li kama suli a. nimi ale ni li nimi soweli. mi pilin e ni: ijo li suli tawa jan la jan li wile kepeken e nimi tawa ona. mi wile toki e kisa mi anu puwa mi la mi o kepeken nimi seme? kisa li ken soweli ko anu soweli lili anu soweli pi kalama noka ala anu soweli suwi… lawa mi li kama pakala. taso kisa mi li ko ala li lili ala li pana e kalama noka mute a. mi o kepeken e nimi seme tawa ona?

ante la nimi mute li kama suli tan ni: jan li toki e ni: mi jan Nimi ala – mi kisa Nimi. anu melome Nimi. ni la jan li toki tawa ona la ona li lukin e ni: sina kisa a? kisa li seme? a kisa li soweli. ona li sama sitelen esun pi nimi sin.

ijo suli li wile e nimi. kijetesantakalu en puwa en kisa en misa li suli a tawa jan.

pilin mi la kulupu pi lipu Linku li kama sona pona e nasin toki pi jan pi toki pona. pona mute tawa kala Asi, tawa mun Kekan San – sina pali pona.