nimi pi mute lili li ken pana e pilin mute tawa jan. musi pimeja anu musi pi toki pimeja (toki Inli la Black Stories) la musi li kepeken e nasin ni:

jan toki wan li sona e ale pi toki pimeja. taso open la ona li toki e toki lili taso. kulupu li wile kama sona e ni: seme li lon?

taso kulupu li ken ala toki e wile sona sama ni: “seme li lon?”. ona li ken pana taso e wile sona sama ni: “ijo ni li lon ala lon?”, “ona li wile ala wile pali e ni?” anu “jan ni li pali ala pali e ni?”

jan toki li ken toki taso e ni: “lon/lon ala”, “wile/wile ala” anu “pali/pali ala”. kin la ona li ken toki e ni: “ni li suli ala”. kulupu li kepeken e wile sona li kama sona lili e sona ale pi toki pimeja.

mute la toki pimeja li monsuta. jan li moli lon toki mute. taso toki pimeja pi moli ala li lon kin.

ken mute la sina sona ala e kon pi toki mi. ni la mi wile pana e nasin wan pi musi ni:

suno

jan toki: “jan li pini e suno. kama la pakala suli li lon. tan seme?”

kulupu: “suno li suli ala suli?”
jan toki: “suli.”

kulupu: “jan li sona ala sona e jan pakala?”
jan toki: “sona ala.”

kulupu: “jan li wile ala wile pakala e jan?”
jan toki: “wile ala.”

kulupu: “suno li ilo ala ilo?”
jan toki: “ilo.”

kulupu li toki e wile sona ante mute. kama la ona li kama sona e ni:

pini: jan ni li pali lon tomo suno pi poka telo. ona li pini e suno suli tan ni: ona li pilin lape. tenpo pimeja la jan pi tomo tawa telo li lukin ala e suno li sona ala e ni: ma li lon. tomo telo li pakala.

pona a! tenpo ni la sina sona e nasin musi pi musi pimeja. mi wile pana e toki pimeja tu. ken la sina ken musi e musi pimeja lon tenpo kama lon poka pi jan ante:

nanpa wan: soweli

jan Te li tawa lon nasin kepeken tomo tawa. ona li lukin e soweli a. kama la jan pi awen lawa li toki tawa jan Te e ni: “sina jan pona!”

soweli ni li soweli lon ala. ona li soweli powe. jan Te li lukin e soweli ni, li awen e tomo tawa, li alasa lon ma poka. poka pi soweli powe la jan lili li lon. ona li pakala tan ni: sike tu ona li pakala. jan Te li toki tawa jan pi awen lawa. mama pi jan lili li alasa e ona lon ma ale. pona la jan Te li alasa e ona. ni la jan lili li ken kama sin lon poka pi mama ona.

nanpa tu: jan suli

jan Kilo li jan suli. ike la ona li jan lili ala. ona o tawa lon telo tan ni: ona li suli. tan seme?

jan Kilo li tawa lon sewi kepeken tomo pi kon seli. ona li tawa lon sewi pi telo suli. taso ilo seli li pakala. tomo kon li kama anpa. jan Kilo li weka e ijo ale tan tomo kon. taso tomo kon li awen tawa anpa. jan Kilo li jan suli a. taso ona li ken ala weka e ona tan tomo kon. tan ni la tomo kon li ken ala tawa ma poka telo. pini la tomo kon li kama lon telo. jan Kilo li weka tan tomo kon, li tawa lon telo tawa ma poka.