open la ale li wan mi wan ona li wan mama kin li wan
taso nasin li lon
li nasin sike li tawa e ale lon sike li sike e ale lon tawa.
ni la sona li kama lon:
ale ala li sama. insa li seli, selo li seli ala.
a. selo. weka selo la mi wan ala li lon. pimeja li lon.
mi suno. weka mi li pimeja. insa mi li suno wawa. selo mi li suno lili.
suno en seli. pimeja en lete. ante a.
ante li kama lon mi kin. mi awen ala sama.
seli selo en suno selo li awen kama lili.
ante li kama suli. mi awen ala wan.
tawa li tawa e ale la, tawa li sike e ale la, sike a li kama lon.
insa li awen suno, li awen seli, li kama sike suli.
selo la sike lili mute li kama lon, li seli ala li suno ala.
taso sike suno seli insa li suno e sike lili, li seli e sike lili, li mama e sike lili.
ni la mi seli ala, mi suno ala, taso mi lete ala, mi pimeja ala…
a! mi ijo. ale li wan ala. ale li mute a.
mi sike wan a. sike ante li lon. mi en ona li tawa lon poka pi sike mama.
sike mute li ante mute. ona li ken telo, li ken kon, li ken ko, li ken kule ale, li ken ante lon suli.
open la, mi kon, mi telo. seli mi li kama lili la, selo mi li kiwen.
mi en sike ante li tawa sike lon poka mama.
sama la, sike pi lili mute li tawa sike lon poka pi sike ante.
sike li sama ala sama mama tawa sike lili?
sike lili ala li tawa sike lon poka mi.
taso ni li ike ala. mama li awen pana e suno e seli tawa mi la ijo ante li kama:

sike suli li mama e mi taso ala. selo kiwen mi la ijo li kama. ijo ni li tawa. ona li moku e seli mama e suno mama. ona li musi. mama mi li pana e pona ni tawa mi. mama li pona.

tenpo la, ante li tan pimeja kin.
sike suli mama taso li pana e suno anu seme? a, lon insa pimeja la, suno ante li lon, taso ona li lili a. ona wan li kama suli lili li kama suli li kama sike suli sama sike mama! ona li kama a! ona li kama lon poka. tawa li kama ante. tawa sike li kama tawa nasa. sike mute li awen lon poka pi sike mama, taso sike mute li tawa lon poka pi sike suno sin. sike suno pi mama ala li tawa weka la, sike lili mute kin li tawa weka.

tawa mi kin li kama ante li kama nasa. mi awen ala lon mama. mi tawa ala sike sin. mi tawa taso. mi tawa. mi tawa. mi awen tawa. mama en suno sin en sike ale li kama weka, li kama lili. mi weka a. pimeja taso li lon poka mi. mi wan. sin la, ale li mi.

sike ante ala li lon poka mi. suno mama li lon ala poka mi. mi taso li lon. selo kiwen mi la, ijo li ken ala awen moku e suno e seli tan mama… ona li tawa ala, li ala.
sike ala li lon. mama ala li lon. nasa suli. ni li ike a.

mi. mi. mi. mi en pimeja. mi en lete. mama li suno ala e mi la, mi pimeja. mama li seli ala e mi la mi lete anu seme. a. lete ala. mi seli ala, taso mi lete ala. ni li ken tan seme?
a, seli li tan insa mi! mi a pana e seli. seli li lili, taso seli li lon. mi ken ala sama mama suli. taso mi ken ala ken mama lili? mi awen pana e seli… a. selo mi la ijo li kama… li tawa!

pimeja kin la mama li ken