nimi Mu li musi. jan mute li alasa e sona ona. soweli anu akesi anu waso anu ijo sama li kalama e wile ona la kalama ni li mu. mute la, soweli li kalama tan ala wile la kalama ni kin li mu. mute la, ilo li ken mu. jan li toki tawa sina la sina sona ala e toki ona la ni li mu ala mu tawa sina? suli la, kalama mute li mu. tenpo la, jan li ken toki sama ni: “kalama ale li ken mu.” - ni la nimi tu li lon tan seme? kalama en mu li ante seme? alasa musi a. taso mi wile alasa pi nasin ante!

mu ale li kalama ala kalama? kalama li lon ala la, mu li ken ala ken lon? nasa. open la, mi o lukin sona: mu la, kalama en seme li lon? pilin la, ijo mute li ken lon. taso mu li lon la mi o sona: ijo li lon, li mu. mu li kama e sona pi ijo mu. mu li ken kama e wile sona lon mi: seme li mu? soweli li mu la, ona li ken kama suli e sijelo ona. “o lukin e mi, o pilin ike, o weka, o utala ala e mi.” ilo li mu la, ona li ken pana e suno wawa tawa mi. “o lukin e mi, o pali, o kepeken tenpo lili, o sona.” a! ijo li tawa ala kute taso, li tawa lukin kin! ni la, soweli li pana ala e kalama li suli taso la, ilo li pakala, li ken ala kalama, li awen pana e suno wawa la, sona mi kalama en sona mi pi kalama ala li ken sama. mi la, mu li tawa ala kute taso, li ken tawa nasin pilin ante kin!

mi sona ala e kili, taso mi moku e ona. ona li jaki utala a tawa uta mi la sijelo mi li pana e mu sijelo tawa mi: “o moku ala a e kili ni, o weka e ona, ona li ken pakala e mi!”
mi tawa mama mi la, ilo suno li laso la, mi sona: mi ken tawa poka ante pi nasin ni. taso mi open e tawa la, suno li kama jelo, li open, li pini, li sike open pini. mu suno ni la, mi sona: “mi o tawa kepeken tenpo lili. ilo li ken kama lon nasin ni lon tenpo poka a!”
jan lili li wile e ijo tan mi suli, taso mi lukin ala e ona. ona li ken toki anu kalama, taso ona li jo e len noka mi, li tawa mute e len mi. mu tawa ni li pana e sona tawa mi: “ijo li lon anpa, li wile e ijo. o lukin a!”