tomo mama mi la ma kasi li lon poka tu. kule ona li sama ala lon tenpo ale: sewi li ante e ma lon tenpo mute. tenpo pini la seli utala li awen, la suno suli en telo lili li kama jelo e ma. taso tenpo sin la telo sin li kama tan sewi; la laso sin li kama lon ma. telo en ma la ni li nasin pona.

mi weka e len lape la mi ken kute: tawa telo li moku e kalama ale. ni la laso sin o lon! lukin mi li alasa lon lupa tomo - a, telo li lon sewi ale. taso anpa la ma li laso lili a… pimeja lili mute a li len e ona, li tawa lon ona, li open e lupa lon ona. tenpo ni la telo li wawa tu: ona li laso e ma, li waso e ma.

waso pimeja la ma mi li poki moku. uta kiwen ale ona li pakala lupa e ma, li alasa e pipi kama. waso li ni lon tenpo telo a tan sona nasa: telo li tawa anpa, la pipi ma li tawa sewi. pipi li ken pilin e mu telo lon sewi ona, li wile tawa ona. nasin ni la telo li kama e ona tan insa ma (tawa insa waso).

waso ale ni la len li pimeja. taso len ale li sama ala: mi lukin e ante lili mute lon sijelo ona. kulupu wan li walo lon len sinpin; kulupu ante li pimeja laso lon len ale, li pimeja walo lon selo uta; luka li ken suli li ken lili; uta li ken nena li ken palisa. kulupu mute ni li kama tan mama ante, taso ona ale li kama wan lon tenpo alasa. lukin la ni li pona e pali ona. waso ni en waso ni li moku; waso ante li awen lon sewi kasi, li alasa e ijo ike (e waso wawa ante, e soweli, e jan), li awen e waso ma. ijo li kama la ona li mu e ni tawa ale.

sewi li kama telo ala, la len waso li kama pimeja ante. suno wawa la laso en loje li ken tawa musi lon selo len. taso waso li tawa lili - ni la pimeja li kama sin. mi lukin e len sama tan poka ante: kule li kama ante tan seme?

lon la ni li nasa a tawa mi. mi sona toki e ni taso: len waso li sama ala len ante. lon selo ale waso la palisa mute li pana e lipu pimeja mute. lipu wan la insa li sama linja lili mute a. linja wan en linja ante li lon poka, li ken awen lon poka tan nena mute lon pini linja. kulupu linja li ken sama selo lili; ni la selo mute a li kama e lipu len.

len nasa ni la suno kin li kama nasa. sona pona la sike suno li pana e wawa tawa ale. ijo ale la selo li ken pana sin e wawa ni, li ken weka e ona. pana la ona li kama kule; weka la ona li pimeja. ni la len waso li pana ala pana e suno? sona pona la ona li pimeja, li pana ala. taso mi o awen sona e insa len: wawa suno li kama lon lipu ale, lon selo lili ale, lon linja lili ale. suno li ken tawa lon lili ale ni kepeken nasin nasa taso! ni la selo wan li ken pana e kule tawa poka wan, tawa ala poka ante. kule li open li pini lon tawa lili wan. waso li wawa a.