toki musi ni li tan toki Aja. jan Owane Tumunjan li pali e ona lon tenpo sike nanpa LLLTTALTW. jan mute li sona e toki ni tan sitelen musi. kulupu pali Amenpin li sitelen e toki ni kepeken toki Lusi lon tenpo sike LLLTTAMMMMTW. sitelen ona li pona nasa tawa jan mute. sina ken alasa e sitelen lon lipu Jutu. taso mi wile toki pona e toki pi jan Tumunjan. kin la mi ante lili e toki. toki pona la musi ni li pona.

jan majuna li jo ala e mani. ona li kama pali lon kulupu. kulupu li alasa e kala. tenpo wan la ona li alasa e kala pona a! jan majuna li luka e kala li pilin: “a. sama jan la kala kin li ken pilin. pilin pona la, pilin ike la, kulupu mama la, kulupu poka la, ni ale li ken lon kala.”

jan majuna li pilin ike tawa kala. kala li toki tawa ona: “o kute! mi musi pona lon telo. jan alasa li jo ike e mi. mi weka la kulupu mama mi en kulupu poka mi li pilin ike. mi lon ala telo la mi kama moli. mi wile lon telo. mi wile musi lon ona. o sona e pilin mi. o weka e mi tawa telo.” kala li toki pi wawa ala. wawa kala li kama lili tan telo ala.

jan majuna li sona e pilin kala li weka e ona tawa telo. “o tawa, kala pona o. kulupu sina o pilin pona.”

kulupu pali li lukin e ni. “sina nasa, jan majuna o! sina pakala e pali mi. o weka! weka moku o moli e sina!”

jan majuna li weka. moku ala li lon. ona o seme? ona li sona ala.

jan majuna li tawa tomo la monsuta li kama lon poka. monsuta li toki tawa ona: “toki, jan majuna o! sina pilin ike tan seme? a, sina jo ala e moku e pali anu seme? o kute. mi pana e soweli pona tawa sina. soweli li pana e telo wawa. o moku pona e ona. o kepeken soweli mi lon tenpo sike tu wan. taso tenpo li pini la mi kama li wile sona e ijo. sina o alasa pana e sona. sina ken la soweli li awen soweli sina. ken ala la mi kama jo e soweli e sina kin. pona ala pona?”

jan majuna li pilin e ni: “a, esun ni li ike. taso mi esun ala la mi moku ala li moli. tenpo sike tu wan la soweli o pana pona e moku. tenpo li pini la mi anpa.” jan majuna en monsuta li esun.

tenpo sike tu wan li pini. jan majuna li moku pona e telo soweli li moli ala. taso pimeja la monsuta li kama. jan majuna li pilin ike: “seme li ken awen e mi tan monsuta?“

mije pona li kama lon tomo. jan majuna li sona ala e ona. mije li open: “toki! mi ken ala ken awen lon tomo sina lon pimeja ni? suno li kama la mi tawa.”

jan majuna li toki: “ken. taso o sona e ni: ike la mi en monsuta li esun. monsuta li pana e soweli. soweli ni la mi moku e telo li moli ala. taso monsuta o kama lon pimeja ni o toki. ona li alasa e sona mi. mi ken pana pona e sona la soweli li awen lon poka mi. mi ken ala la monsuta li kama jo e mi. mi sona ala e nasin pona pi toki sona. ken suli la monsuta li anpa e mi. wile mi la ona o anpa ala e sina kin!”

mije la: “ale o pona, jan majuna o.” mije li awen lon tomo.

pimeja li kama. jan majuna li kute e kalama suli. ijo li luka wawa e lupa tomo.

jan majuna la: “jan seme li lon?”

jan majuna li kute e ni: “mi jan ala. mi monsuta! mi kama. o kute e wile sona mi. o pana e sona!”

jan majuna li pilin monsuta li ken ala toki. pakala! mije li toki: “o pilin monsuta ala. mi o toki tawa ona.”

monsuta la: “mi lon a!”
mije la: “mi kin li lon.”
“a? sina kama tan seme?”
“mi kama tan weka telo.”
“sina kama lon poka telo kepeken seme?”
“kepeken pipi lili.”
“pipi li lili la ma telo kin li lili anu seme?”
“lili ala. waso wawa li alasa tawa lon sewi telo la ona li ken ala.”
“a, waso li lon sike mama taso anu seme?”
“lon sike ala. luka pi waso ni li suli, li ken len pimeja e ma tomo.”
“ma la tomo pi mute ala li lon anu seme?”
“mute a. soweli wawa li alasa tawa tomo ale la ona li ken ala.”
“soweli li lili ike anu seme?”
“ike ala. selo soweli li ken len pona luka.”
“len li pona tawa seme?”
“soweli li tawa mute li wile lape la len li pona.”
“seme li pana e len tawa soweli?”
“waso li tawa lon sewi tomo la luka ona li pana e len pimeja tawa soweli.”
“a, waso li tawa lon sike anu seme?”
“waso li kama tan sike li tawa lon sike li ken awen lon sike luka.”
“aaa! sina toki e len seme, e sike seme, e luka seme! mi ken ala sona!”

monsuta li pilin e sona wawa mije. monsuta li anpa li tawa weka.

jan majuna li pilin pona. “mije o! sina awen e mi tan monsuta. seme la mi ken pana e pona tawa sina?”

mije la: “lon la sina pana e pona tawa mi. sina pana e mi tawa telo, tawa kulupu mi. pona sina li kama sin lon sina. mi kala. mi tawa.” ni li nasa pona e pilin pi jan majuna.