lipu tenpo

li alasa e jan pali sin

jan Enwi Wali

jan jan Wasopimeja tenpo 2026-10-26 lipu nanpa pimeja sona sona

jan Enwi Aka Wali[1] li jan pi tenpo majuna[2] pi ma Juwese. mama li pana e ona lon ma lili Ajowa. kulupu ona li mama e kili li pali e lipu. lipu ni li toki e kili. jan Enwi li olin e kasi e kili. jan So Wasinton Kawa[3] li sona e kasi mute li pana e sona tawa jan sin Enwi. jan Enwi li tawa tomo sona suli li alasa e sona pi kili jelo. kili moku ni li jo e nena lili mute li jo e selo laso pi moku ala. ijo mute li pona tawa ona. ona li sona e kili e nimi e nanpa e mani e lawa.

jan Kawin Kuli[4] en jan Apa Uwa[5] li lawa e ma Juwese li wile e ni: lawa li lon. esun li lon. ni tu o awen ante. ike li lon esun la lawa o pona ala e ona. nasin ni li ike a tawa jan Enwi Wali. jan Uwa li jan lawa la esun li pakala suli la jan kasi li jo ala e mani. jan Enwi li wile e ni: kulupu lawa o pona e esun. jan Penkin Teleno Osawe[6] li wile e ni kin la jan Enwi li alasa pana e lawa tawa ona. jan Enwi li toki tawa jan li alasa e ni: ona li wile e jan Osawe kin.

jan Penkin Osawe li kama lawa e ma Juwese. jan mute li wile e ona. jan Osawe la jan Wali li kama jan lawa kasi. jan Enwi Wali li jo e wawa ni la ona li alasa pona e nasin kasi. jan Enwi Wali li lawa e nasin kili la jan kasi li kama jo sin e mani. jan Wali li wile e ni kin: ma ale o kama wan lon tenpo suli. taso lawa mute pi ma ante li ike tawa ona. jan Wali li toki e ike pi kulupu lawa Tosi pi kulupu lawa Nijon pi kulupu lawa Italija.

ma Juwese la jan lawa tu li lon. jan wan li jan lawa sewi. jan wan li jan lawa anpa. jan lawa sewi li wile e jan lawa anpa la wile ona li kama lon. tenpo ni la jan lawa anpa pi jan Osawe li jan San Nen Kana[7]. taso nasin mute la jan ni en jan Penkin Osawe li pilin e ante. jan Osawe li jan lawa pi tenpo tu la jan Kana li alasa kama jan lawa sewi. taso jan mute li awen wile e jan Penkin. ona li awen jan lawa li wile e jan lawa anpa ante. ona li wile e jan Enwi Aka Wali.

jan Enwi Wali li tawa ma Mesiko li lukin e ni: jan kasi li pali mute wawa li awen jo e lili taso. jan Enwi li tawa ma Juwese lon tenpo sin li toki tawa jan mani li alasa pona e nasin kili pi ma Mesiko. tenpo ni la utala li lon ma Elopa lon ma Asija. ma Tosi li pakala e jan mute pi ma Tosi pi nasin ante e ma Kanse e ma Posuka. ma Nijon li pakala e ma Sonko e ma Anku e ma Juwese. jan Enwi li lukin e utala li toki tawa kulupu Juwese li toki tawa jan pi ilo utala li toki tawa jan Osawe li pona e pali pi jan ale ni.

ma Juwese la jan lawa sewi li moli la jan lawa anpa li kama jan lawa sewi. jan Osawe li majuna a. ona li moli la jan Enwi Wali li kama jan lawa sewi. ni li ike tawa jan mute. jan li pilin e ni: jan Wali li wile e nasin lawa kulupu. ona li sama ma Lusi. jan pi kulupu ni tu li wile ala e jan Enwi li wile e jan Ewi Esu Sumin[8]. jan Wali li awen pona tawa jan Osawe. taso jan Osawe li ken ala kama e jan lawa anpa. jan Osawe li lon ma Elopa li pali e utala lon ni. jan Ewi Sumin li kama jan lawa anpa pi ma Juwese.

jan Penkin Osawe li pilin e ni: jan Wali li ken ala jan lawa anpa la ni li ike. ona li toki e ni: jan Wali li ken jo e pali ante pi wile ona. jan Wali li wile jan lawa esun li kama jan lawa esun. utala suli li pini. jan Osawe li moli. jan Sumin li kama jan lawa sewi. jan Enwi Wali li awen jan lawa esun. ona li wan e nasin Juwese pi lawa lili e nasin Lusi pi lawa suli. ma Juwese en ma Lusi li lon poka utala tan jan Sumin. ni li ike tawa jan Wali la ona li weka tan lawa esun. tenpo kama la ona li wile jan lawa sewi. kulupu lawa ala li wile e ona la ona li pali li lon e kulupu lawa sin. jan pi mute lili li wile e ona la ona li kama ala jan lawa sewi. ona li awen pali lili. ona li toki li kute e pona pi jan lawa Juwese pi tenpo kama.

  1. jan Henry Agard Wallace ↩︎

  2. ijo pi tenpo pini ↩︎

  3. jan George Washington Carver ↩︎

  4. jan Calvin Coolidge ↩︎

  5. jan Herbert Hoover ↩︎

  6. jan Franklin Delano Roosevelt ↩︎

  7. jan John Nance Garner ↩︎

  8. jan Harry S. Truman ↩︎