jan li ken toki e ijo ale kepeken toki pona. ni li lon ala lon?

mi wile pana e toki lili:

jan li lon insa tomo li sona ala e tomo ni. tomo la ijo mute li lon ala.
nasin wan li lon. taso nasin li pini. jan li ken ala open e nasin.
nena tu li lon poka nasin. nena wan li sama nena ante. nena wan li lon poka wan nasin. nena ante li lon poka ante nasin.
ken la jan li kepeken nena la jan li ken open e nasin.

tenpo ni la jan li kute e kalama pi jan ante. jan ante li toki e ni:
"toki a! mi sona ala e sina li ken ala lukin e sina li ken ala kute e sina. taso mi wile pona e sina. mi wile e ni: sina ken weka tan tomo.
mi sona e ni: tomo sina la nena tu li lon. sina kepeken nena wan la sina ken open e nasin. taso sina kepeken nena ante la sina kama moli a!"

jan ante o toki e seme? nena wan li sama a nena ante.
kule nena li ante la jan ante li ken toki e ni: "o kepeken nena loje!" anu "o kepeken nena pimeja!". taso kule nena li sama.
nena wan li lon anpa pi nena ante la jan ante li ken toki e ni: "o kepeken nena anpa!" anu "o kepeken nena sewi!". taso nena wan li lon poka pi nena ante.

jan ante li ken toki e ni: "o kepeken nena wan!" anu "o kepeken nena tu!". taso wan en tu li seme?
jan ante li ken toki e ni: "o kepeken nena pi sitelen open!" anu "o kepeken nena pi sitelen pini!". taso ken la jan pi insa tomo li tan ma ante li sitelen ante.
jan ante li ken toki e ni: "o kepeken nena pi luka wawa!". taso ken la jan pi insa tomo la luka ante li wawa.

nimi pi pu ala la nimi poka la nimi "soto" en nimi "teje" li lon. jan ante li ken toki e ni: "o kepeken nena soto!" anu "o kepeken nena teje!" jan pi insa tomo li sona e nimi ni la ona li ken weka tan tomo. ale li pona.

lipu ni la mi wile ala e ni: kulupu pi toki pona o kepeken nimi "soto" o kepeken nimi "teje"!
mi wile e ni: kulupu pi toki pona li toki lon nimi poka. nimi poka li suli sama kule anu seme? nimi poka li suli sama anpa sama sewi anu seme?

pilin mi la ona li suli. mi wile toki lon luka wawa mi. sina seme?