pilin pi mute seme li lon? jan li toki insa e toki ona la ken suli la ona li pilin e ni: “pilin mute li lon. mi ken ala nanpa e ona.” jan li open e kama sona ona pi toki pona la ken suli la ona li pilin e ni: “a. toki pona li toki lili. pilin tu taso li lon. jan li ken pilin pona li ken pilin ike. pona en ike li ijo ale.” sona jan pi toki pona li kama suli la ona li kama sona e ni: pilin tu ni li pilin ale ala. jan li kama sona pona la sona ni li kama: toki pona la pilin mute kin li lon. jan li ken pilin pona anu pilin ike, li ken pilin sama anu pilin ante, li ken pilin wawa anu pilin lape, li ken pilin musi anu pilin utala... nimi mute li ken nimi pilin. taso pilin seme li suli tawa wile jan, tawa nasin jan? pilin pi mute ala la, pilin seme li suli?

sike nanpa MALLL la, kulupu Pisa li pana e sitelen sin tawa. sitelen li toki e jan lili, e pilin ona insa. musi la pilin li sama jan, li ken tawa lon insa lawa, li ken toki, li lawa e jan lili. sitelen li pana e pilin luka taso: pilin pona en pilin ike en pilin monsuta en pilin utala en pilin jaki li lon insa lawa pi jan lili.

tenpo mute la pilin pona li lawa e jan. ona li wile e ni: tenpo ale la pona o awen lon poka jan, lon lawa jan. jan o sona e pona, o awen e pona lon lawa. jan li pilin e tenpo pini ona la pona pi tenpo pini o kama sin o pona e pilin. ale o pona. pilin ike o ken ala kama lon lawa o ken ala ike e pilin jan.

taso pilin pona li ken ala moli ale e pilin ike. kulupu mama ona li tawa ma sin la pilin ike li kama. pilin pona li kama utala e pilin ike la ona tu li weka tan lawa. weka la pilin seme li lawa e jan? pilin utala en pilin jaki en pilin monsuta li alasa lawa pona e jan lili. taso ona li ken ala pana e pona, li pakala taso e wile jan. jan li kama pilin e pona ala, e ike ala, e monsuta ala, e utala ala, e jaki ala. ona li pilin e ala, li wile e ala. ona li alasa tawa weka taso tan mama ona. ike suli.

pilin pona en pilin ike li wile ala pakala e jan lili. ona li pini e utala ona li kama wan. ni li kama sin e pilin lon lawa jan. jan li kama sona pona e wile ona e pilin ona. ona li wile ala tawa weka. ona li pilin ike taso tan ni: kulupu li tawa ma sin. taso ma sin li ma ike ala li ken ma pona kin. ma la, kulupu la, jan li kama pilin ike li kama pilin pona lon tenpo sama. ni li pona e lawa ona, li pini e pakala pilin.

sitelen li wile toki e seme tawa mi ale? jan li ken ala pilin pona lon tenpo ale. pilin ike en pilin utala en pilin monsuta en pilin jaki li suli kin tawa jan. pilin ike li pakala ala e jan. ona kin li ken pona tawa ona. pakala li kama lon tenpo ni taso: jan li alasa pini e pilin ona ale. sona suli a!