sina wile pali mute la, sina ken pali e musi pi sitelen tawa. pali musi li musi mute! taso pali musi li pali mute.

tawa open la, o alasa e ilo musi. sina jo e ilo nanpa supa la, sina ken jo e ilo musi mute. ni mute li mani ala li pona e musi. o kepeken e ni. sina pali e ilo musi la, lawa pakala mute li kama!

ilo musi li wawa mute. sina ken wan e toki ilo e sitelen e sitelen sijelo tawa ilo wan. ilo musi mute li pona. mi olin e ilo Koto (Godot) e ilo Piko-8¹ (Pico-8). ilo Koto li wawa li mani ala. ilo Piko-8 li lili li mani ala tawa kama sona taso (Pico-8 Education Edition). ilo musi ante li lon, taso ona tu li pona tawa mi.

sina wile kepeken e ilo musi la, o kama sona e toki ilo. ilo musi ante li kepeken e toki ante. sina ken lukin e lipu pi kama sona e sitelen tawa pi kama sona. ni mute li pona mute! toki ilo li pali e seme? toki ilo li lawa e musi. sina wile e sitelen tawa la, toki ilo li tan e tawa. sina wile e nena pali la, toki ilo li tan e pali tan nena. toki ilo li wawa! taso, sina wile e lawa wawa tawa kama sona.

kin la, sina wile e sitelen la, sina wile e ilo sitelen nanpa. sina ken kepeken e ilo sitelen pi wile sina. taso, mi toki e ni: o kepeken e ilo sitelen pi mani ala! sina ken kepeken e lipu Pike (Piskel). ona li pona li mani ala li ilo lon lipu linluwi². sitelen sama ni li pona tawa jan pi kama sona tan ni: sitelen sama ni li wile e wawa lili. jan pi sitelen mute li kepeken e ilo supa sitelen tawa sitelen. taso, ni li mani mute li ike tawa jan pi kama sona.

sina jo e ilo musi e ilo sitelen e toki ilo la, sina ken pali e musi pi sitelen tawa! lon ilo musi la, sina ken pana e sitelen. kin la, sina ken pana e toki ilo. ilo musi li jo e toki mute tawa lawa pona tawa sitelen.

sina pali e seme? sina sona ala la, sina ken pali e ijo mute. mi toki e ni: o pali e musi lili! tenpo ale la musi pi open wan li wile e pali mute. sina pali e musi lili la, sina pali mute ala. sina ken kepeken e musi mute tawa pali pona. sina ken kama wawa kepeken pali musi pi jan ante! sina jo e ala la sina pali e musi la ni li pali mute.

taso, mi sona e ni: sina wile pali e musi la, sina wile e musi sin. tan ni la, o pali e ni! ni li pali mute, taso ni li pona mute. mi toki e ni: o pali wan e musi lon, o pali tu e musi sin. tenpo pi pali tu la, sina jo e sona sin mute.

tenpo kama la, sina jo e musi pi sitelen tawa! tenpo ni li pona mute mute tawa mi. mi olin musi e musi. sina pali e musi la, sina ken musi e musi! kin la sina awen pali e musi la sina o awen musi e ona. ni la sina kama sona e wawa ona e pakala ona. taso, sina pini la sina ken pana e musi tawa jan pona ale. sina mute li ken musi mute! tawa pali musi la, mi olin e ni.

¹ sina ken toki e nimi Piko-8 sama ni: Piko luka tu wan.
² linluwi li kulupu suli pi ilo nanpa. linluwi li wan e jan pi ma ale.