mi lon supa. jan poka pona kin li lon. anpa supa la, telo li suli li jo e mute li mute e jo. sewi supa la, kon li suli li wile ala awen jo e ijo. ijo ante li lon ala poka. jan ante ala li lon. ni li ike ala. mi wile la, mi ken toki anu mu tawa jan weka kepeken ilo. moku ala li lon. ni li ike ala. mi moku suli lon open pi tenpo supa. ma ala li lon. taso supa li lon la, ma li ken lon tenpo ante. ijo wan taso li ike: tawa ala li lon.

jan poka li mu ike – “ni li ike. mi wile e ante” – “ante a o lon” – “mi pilin pi musi ala. pilin mi li ike lon insa mi” – lon toki ona ni la, mi lukin e ona – “seme? pilin li lon ala lon insa?” – “lon” – “ni li ken ala” – lon toki mi ni la, ona li lukin e mi – “a. o toki e ken ala”

mi pana e noka mi lon telo. suno li seli e kon. taso telo li awen lete. jan mi kin li telo lete e noka. mi tu li kama pilin e sama – “o pilin e lete” – “mi pilin” – “insa noka li lete ala lete” – “lete ala. ona li seli lon insa” – “sona pona. taso mi pilin e lete lon selo noka” – “pilin” – “ni la, pilin li lon ala insa” – “a taso pilin lete en lete ala li tawa insa”

mi kama sewi lon supa. ona li tawa sama. mi lon poka supa wan. ona li lon poka supa ante. mi tawa insa. ona li tawa insa. ni li sama utala – “sama tenpo ante la, sina nasin ante e sona e nimi. sina wile utala taso anu seme?” – “ala. pilin mi en pilin sina li ante. ni li ale” – mi utala pi wawa lili taso e luka ona kepeken luka mi – “a” – “sina pilin ala pilin e luka mi” – “pilin a” – “o lukin e selo luka sina. ona li kama loje lili pi tenpo lili” – “kama” – “sina pilin e luka mi lon selo sina. luka sina li pilin e utala lon selo ona taso. ale pilin li lon selo li lon ala insa”

ona li kama utala musi sama e luka mi – “a” – “o kute” – “mi kute” – “mi utala lili taso e sina la pilin li ike lili anu ike ala” – “ike ala” – “pona. taso mi utala ike pakala e sina la sina kama pilin ike a” – “kama. sijelo mi li ken pakala” – “a, taso tenpo la, sijelo sina li ken pona e pakala. pilin pakala sijelo li kama weka. taso sina ken awen pilin ike e mi tan pakala ike mi” – “a. taso mi awen pilin e sina pi insa mi ala”

jan mi li kama supa lon supa – “pona la mi ike ala e sina. mi wile ala utala e sina” – “taso pilin pi mi tu li ante” – “a. aaa. taso ni li pana e sona” – “seme” – “pilin mi en pilin sina li ante” – “ante a” – “taso mi tu li lon poka. mi ken pilin e ijo sama” – “a. taso mi pilin e ijo sama la pilin li awen ante la ante li tan seme” – “insa. insa mi en insa sina li ante. pilin li lon insa.” – “taso pilin li lon insa la seme la mi ken pilin e ijo pi insa ala?” – “pilin li wawa ni” – “aaa. ni li ken. ni li ken. pilin li ken lon insa”

mi toki ala lon tenpo. a. ijo pona li kama. ante li kama. kon en telo li kama tawa. nena li kama lon telo. supa mi li tawa ma poka. tawa li awen wile e tenpo. taso mi kama.

mi kama lon ma la mi wile sona e ijo – “pilin li lon insa mi. taso pilin li insa ala insa mi?” – “a. ijo suli. mi sona ala. sina pilin seme e ni” – “mi kin li sona ala. mi o alasa e sona” – “pona. taso open la mi wile alasa e ijo pi ma sin ni” – “nasin pona”