tenpo pini weka la jan lawa suli li lon. ona li lawa e ma suli. suno ale la jan wan li kama lon poka ona li toki : “ jan lawa mi o, o pilin pona e jan pi ma sina. sina pilin ike e jan ante la sewi li ni e sina kin.” jan ni li kama jan poka pi jan lawa la jan ante li pilin ike tawa ona li wile e ni : jan lawa o weka e jan ni tan poka ona.

ni la jan pi pilin ike li tawa tomo pi jan lawa li toki : “jan lawa mi o , jan sina pi toki pona li toki e ni : “kon pi uta sina li jaki mute.” jan lawa li toki : “kepeken nasin seme la mi sona e lon pi toki sina.” jan li toki : “ ona li kama lon poka sina la o poka mute e ona tawa sina. ona li len e nena ona kepeken luka la sina ken sona e lon pi toki mi.”

ona li tawa tomo pi jan pona li toki : “jan pona o , mi wile e ni : sina kama tawa tomo mi li moku e moku pona lon open pi suno kama. sina wile ala wile.” jan li toki : “ mi wile.” ni la ona tu li moku. taso moku la kili namako li lon. ona li pona e moku li pilin pona tawa uta. taso jan li moku e ona la kon uta li kama jaki.

moku li pini la jan pona li tawa tomo pi jan lawa. taso tenpo ni la jan lawa li poka nasa e ona tawa ona. ona li lon poka pi jan lawa la ona li kama len e nena ona kepeken luka tan pilin ni : kon jaki pi uta mi li pilin ike e jan lawa. jan lawa li lukin e ni la ona li pilin e ni : toki pi jan ante li lon.

tenpo lili li pini la jan lawa li pana e lipu tawa ona li toki : “ o pana e ni tawa jan pali suli.” tenpo mute la jan lawa li wile pana e pana mani tawa jan la ona li pana e lipu tawa ona. taso jan pona li kama ike lon pilin ona la ona li sitelen e ni lon lipu : “ jan pali mi o , jan li kama tawa sina li pana e lipu ni tawa sina la sina o moli e ona o weka e selo ale ona o len e kasi pi moku soweli kepeken selo ona o pana e ona tawa mi.”

jan pona li weka tan tomo pi jan lawa li tawa tomo pi jan pali li pilin pona tan ni : lon pilin ona la jan lawa li pana e mani tawa ona. lon nasin la jan ante li lukin e ona li kama lon poka ona li toki : “ jan pona o , sina tawa seme.” ona li toki : “ mi wile pana e lipu ni pi jan lawa tawa jan pali suli. ona li ken pana e mani tawa mi.” jan ante li kute e ni la ona li toki : “ tawa li wile e tenpo mute la mi tawa li kama jo e mani sina li pana e ona tawa sina. ni li pona ala pona.” ona li toki : “ pona a.”

ni la jan ante li tawa tomo pi jan pali li pana e lipu la jan pali li toki : “ lipu ni li toki e ni : mi o moli e sina.” ona li pilin monsuta mute la ona li toki : “ jan pi lipu ni li mi ala. o sona e lon pi toki mi tan jan lawa. sina ni ala la o moli ala e mi.” taso jan pali li toki : “ nasin pi jan lawa li ni : lipu li kama tan ona la mi o toki ala e ijo lipu. ni la mi o moli e sina.” ona li moli e ona li pali e ijo ale pi toki lipu.

jan pona li tawa sin tawa tomo pi jan lawa la jan lawa li pilin nasa li toki : “ jan o , sina seme e lipu.” ona li toki : “ mi pana e ona tawa jan ante.” jan lawa li toki : “ taso jan ante ni li toki e ni : sina toki jaki e kon uta mi. ni li lon ala lon.” ona li toki : “ ala a.” jan lawa li toki : “ sina lon poka mi la sina len e nena. ni li tan seme.” ona li toki e tan lon la jan lawa li sona e ike pi jan ante li toki e ni tawa ona : “ sina pona. taso jan ante li pali ike la sewi li pakala e ona. toki pona sina li lon a.”