tomo la, sina jo e ijo mute ala mute? sina wile ala wile lili e ona? ijo jo sina li mute ala la, sina lili e ona kepeken nasin seme? tomo mute la, ijo jo li kama mute lon tenpo suli. ni la, jan li wile weka e ona. taso, jan li weka e ona kepeken nasin seme? seme li wile awen? seme li wile weka? nasin mute la, mi wile toki e nasin wan ni: nasin pilin pi ijo jo.

jan li wile lili e ijo tomo la, ona li wile taso e ijo tawa kulupu weka. mute la, jan li lukin e ijo wan, li toki insa e ni: “ona li ken ala ken kepeken? ona li mani mute anu mani lili? pona ala pona lukin? majuna anu sin? jaki ala jaki?” toki lili la, jan li toki insa e ken pi tenpo kama. jan mute li weka e ijo jo kepeken nasin ni.

nasin ni li pona ala pona tawa sina? mi la, ni li pona tan ni: mi weka e ijo pi ken ala. taso ike kin li lon: ken li suli nanpa wan ala. jan li kama jo e ijo tan ken taso anu seme? ala. tan mute li lon. suli la, jan li kama jo e ijo tan ni: jan li wile pona e lon ona. ni la, jan Komali (Konmari anu Kondo Marie) li toki e ni: sina wile lili e ijo tomo la, sina o kepeken nasin pilin.

nasin pilin li seme a? mi pana e nasin ni tawa sina. o lukin e ijo jo wan sina. ken la, ona li len, anu lipu, anu ilo, anu supa. o luka e ona, o pilin e selo ona. o lukin pona e kule e sijelo ona. o awen pilin e lon ona. kama la, o lukin lon insa sina. sina pilin seme? ijo ni li kama e sona sina pi tenpo pini anu seme? pini la, sina o kute e sijelo sina. uta li tawa tan pilin anu seme? lukin sina li telo ala telo? insa sijelo li seli, li tawa wawa (toki Nijon: tokimeku) li pana e pilin pona anu seme?

nasin pi jan Komali la, ijo jo li kama e pilin jan. pilin ni li ken pona li ken ike. jan Komali li toki e ni: sina o awen e ijo pi pilin pona taso. ijo li kama e pilin ike anu pilin ala la, o weka e ona. sina ken toki e ni tawa ona: “tenpo pini la, sina pali pona lon poka mi. o tawa pona.” nasin pilin ni la, tomo sina li pana e pilin pona lon tenpo ale. ante la, ijo sina li kama lawa e sina kepeken pilin ike lon insa sina.

sina wile lili e ijo tomo la, nasin pi pilin jo li pona mute. ijo tomo li mute ala la, pilin pona pi ijo wan li suli. ijo mute li toki e ni: “ken la mi pona.” taso ijo wan li toki e ni: “mi pona a.” sina ken kute pona e pilin insa lon tomo la, sina ken weka e pilin jaki tan tomo. nasin ni la, ijo pi wile pona taso li awen lon tomo sina.