🌱 kasi li kama lon
ona li lon ma laso
taso kasi ante li lon ala li lon ma ante
kasi li pilin wan li pilin ike

🦔 soweli li kama tawa kasi
ona li alasa e mama ona
soweli li pilin wan li pilin ike
ni la kasi li wile pona e soweli li pana e kili suwi tawa soweli
soweli li moku e kili suwi li pilin pona
ni la kasi li pilin wan ala li pilin pona kin
tenpo lili kama la soweli mama li alasa e soweli ona li kama tawa kasi
soweli li lukin e mama ona li pilin pona mute
ona tu li weka
kasi li pilin pona tawa soweli
taso kasi li pilin wan sin li pilin ike sin

🐦 waso li kama tawa kasi
ona li wile pali e tomo li alasa e kiwen kasi lili
ni la kasi li wile pona e waso li pana e kiwen kasi lili tawa waso
waso li kama jo e kiwen kasi lili
waso en waso olin ona li pali e tomo kepeken kiwen kasi lili lon ma ante
ni la kasi li pilin pona tawa waso
taso kasi li pilin wan sin li pilin ike sin

🐟 telo li lon poka kasi
jan li alasa e kala lon poka ante pi telo suli kepeken palisa alasa
ona li wile kama jo e kala li wile moku e kala
kala li wile ala e ni li pilin monsuta
kasi li wile pona e kala
jan li weka e linja tan palisa pi alasa kala la kasi li kama jo e linja ni
ni la linja li ken ala tawa
jan li ken ala kepeken e palisa pi alasa kala li pilin utala
kala li pilin pona mute li tawa tan jan li weka
kasi li pilin pona tawa kala
taso kasi li pilin wan sin li pilin ike sin

😵 tenpo kama la jan li moli e kasi
ni la kasi li lon ala
taso kulupu soweli en kulupu waso en kulupu kala li awen lon tan kasi
waso li moku e kili suwi li kama jo e kiwen sike tan insa pi kili suwi
soweli li pana e kiwen sike lon insa ma
kala li pana e telo tawa ma pi kiwen sike
kasi sin li kama lon
kasi li lukin e ni
kasi ante li lon poka kasi
kasi li pilin wan ala li pilin pona
ale li pona