mi ale li lon ma. ona li jo e ma suli e telo suli. kulupu li nimi e ma suli. ona li ma Apika li ma Asija li ma Elopa li ma Amelika li ma Oseja li ma Antasika. telo la ma mute ante li lon. taso mi o toki e ona lon tenpo ante.

open la jan li lon ma Apika taso. tenpo lon la ona li lon ma ale. ni li kama lon nasin seme? tenpo sike pini TAAA en tenpo poka la, kulupu li weka tan ma Apika li kama lon ma Asija pi pini suno. tenpo suli li weka la, kulupu li kama lon ma Elopa, lon ma Asija pi kama suno kin. ma jan li kama suli. kulupu jan li wan ala, li kulupu mute lili taso.

jan ni pi tenpo pini li sama ala sama jan pi tenpo lon? sama ala. jan sona li lukin e sijelo moli ona la, ona li ken sona e ni: jan ni li tan tenpo pini, li sama ala mi, li sama ala sina. kulupu pi tenpo pini la jan sona li pana e nimi ni: ona li kulupu Homo erectus. nimi ni la, ona li sama jan, li tawa kepeken noka ona taso.

ma li kama suli la jan li kama ante. kulupu Homo erectus li kama kulupu tu. ma Elopa la kulupu Homo neanderthalensis li kama lon. jan sona li kama lukin e sijelo ona lon ma Nejanta lon ma Tosi li pana e nimi ma tawa ona. ma Apika la kulupu Homo sapiens li kama lon. kulupu ni li kulupu mi. nimi ona li toki e sona wawa ona.

sin la jan li kama tan ma Apika. kulupu Homo sapiens li weka tan ma Apika li kama lon ma Asija sama kulupu mama ona. tawa ona li open lon tenpo sike pini LLAA. sama la ona li kama lon ma Elopa li kama lon ma Asija pi open suno. taso ona li tawa ma sin kin. ona li kama lon ma Oseja li kama lon ma Amelika.

seme la jan li kama lon ma weka? ma Asija en ma Amelika la, telo suli li lon insa. ni la jan li tawa lon telo anu seme? tawa ala. tenpo la ma li ken kama lete li ken kama seli. lete la telo li kama kiwen. telo mute li kama kiwen la telo lili li awen. ni la ma tu li ken kama ma wan. ma lili li wan e ma Asija e ma Amelika tan lete la jan li ken tawa ma Amelika. ma li kama seli lon tenpo sin la, jan li ken ala weka tan ma Amelika.

kulupu Homo neanderthalensis la seme li kama? tenpo sike pini TTAA la ona li pini. pini ona li tan seme? jan li sona pona ala. ken la jan pi kulupu mi li moli e ona ale. ken la kulupu tu li unpa la kulupu tu li kama kulupu wan. ken la kon li kama lete li kama seli sin la, ni li lili e kulupu, li moli e ona.