kon li lete la, pali mute li ken ala. kasi li kama pana ala e pan e kili. kili li alasa tawa ma lete la, ona li kama ala kasi sin. jan li wile tawa kepeken noka la, noka li wile e wawa pi mute ike tan ko lete mute. kulupu li lili e pali tan tenpo lete. pali ala la jan o seme? jan o musi a. ma lete mute la musi li lon. ken la kulupu li tawa lon poka, li kalama. ken la kulupu li open e kasi suli, li namako suwi e ona. ken la jan suli li pana suwi e ijo tawa jan lili.

tenpo lete musi li kama lon ma Sensa lon ma lili Jele la, soweli li kama lon. nimi soweli en nimi ma li sama. ona li soweli Jele. soweli li suli a sama tomo. lawa soweli la palisa tu li lon, li suli sama lupa tomo. taso soweli ni li moku ala, li lape ala, li tawa ala a. ona li sama soweli tawa lukin taso. insa ona li insa soweli ala, li ko kasi a.

tenpo sike ale la, kulupu li kepeken ko kasi, li pali e soweli suli. soweli pi ko kasi li musi e pilin kulupu. soweli ni o awen lon ale pi tenpo musi lete. taso sike mute la soweli li awen ala a. ijo li pakala wawa e soweli.

ko kasi li jelo. telo mute li weka tan ona. ko li kama ken seli wawa. sike open la jan wan li seli e ko. seli li moku wawa e sijelo soweli. kulupu li ken ala pini e seli, li ken ala awen e soweli. lawa ma li lukin e seli, li utala e jan pakala.

seli wan li musi lili. musi suli li ni: seli li awen kama. sike #TT la seli kin li pakala e soweli. sike #MT la kulupu li lili e ken seli kepeken telo pona. awen la soweli li seli. sike #MLT la kulupu li pali e soweli tu a. ona tu li seli sama. sike #MLLTT la soweli li kama lon li kama seli lon suno sama a. sike #MMLLW la jan Tonko pi ma Juke li kama lon ma Jele li toki e soweli. jan Tonko li weka la, soweli li kama seli.

kulupu li sona e ken seli, li wile ala a e seli, li utala wawa e ona. taso pakala ante li awen kama. sike #LTW la jan wan li kama jo e soweli kepeken ala nasin lawa. lawa ma li utala e ona. sike #LL la noka soweli li wawa ala li pakala. soweli li kama anpa. sike #LLW la ilo tawa li utala wawa e soweli. sike #MLLL la telo suli li moku e soweli. sike #MMLLLTW la waso mute li moku e soweli. sike #MMM la kon wawa li tawa, li tawa anpa e soweli. lukin la soweli li kama lape.

lawa ma la, kulupu poka kin la, pakala soweli o pini o kama sin ala. taso ike pakala li seme? pakala taso la jan mute li kama sona e soweli e ma lili kin. jan mute li wile kama li wile lukin. ken la jan musi li ken wawa e mani ma. pakala ni li wawa a e musi.

o musi lon tenpo lete. o tawa ma Jele. o lukin e soweli Jele. taso o seli ala e ona. lawa ma li ken utala e sina.