ma Pilipina li jo e nena pakala mute. tenpo ni la, nena pakala tu li pakala! nena pakala suli tu tu li lon: nena Tala¹, nena Pinatupo², nena Majon³, nena Kanlajon⁴. tenpo poka la, ona li pakala, li pana e kon ike e telo sewi tawa ma poka. taso, sina o sona e ni: seme la ona li lon?

ma Pilipina li jo e ma telo mute. ma ni li lon poka pi ma telo Pasipiko⁵. lon anpa pi telo suli ni la, ma li lon. ona li kipisi pi sijelo pi mun jan. kipisi mute sama li lon. kipisi ni li tawa la, ona li tawa kipisi ante, li pali e nena e lupa e ma telo. ona li pali e nena la, telo seli li ken tawa sewi. ni la, nena ni li ken kama nena pakala. ni la, ma Pilipina li jo e nena pakala mute a!

nanpa wan la, nena Pinatupo. ma tomo Ankele⁶ li lon poka ona. tenpo sike #LLLTTAMMMMLLW (nasin nanpa Intu-Alapi la, #1991) la, ona li kama pakala. suli la, ona li pakala suli nanpa tu lon tenpo ona. ona li pakala tan ni: lon sewi ona la, lupa lili li lon. telo li lon lupa ni. telo ma seli li tawa sewi la, ona li kama lon poka pi telo ni. ni la, telo li kama kon li pakala a! kon seli ni li tawa seli, li tawa anpa lon selo pi nena ni. kon seli ni li jo e ko seli kin. tan ni la, tomo mute li kama pakala lon poka pi nena ni. jan mute li kama jo ala e tomo ona. tomo pi tomo waso Ka li kama pakala kin. taso a, tenpo ni la, lawa li pona e tomo pakala mute. taso, ona li pona e ale ala. pakala mute li awen lon tenpo ni.

nanpa tu la, nena Tala. lon la, ni li nena wan ala. nena suli li lon. lon insa ni la, lupa suli li lon kin. ona li poki e telo. lon insa ni la, nena lili li lon kin. tenpo ni la, ona li jo e lupa, li poki e telo. ona li lon ma lili Kapite⁷ li lon ma lili Patanka⁸. lon poka ni la, ma tomo mute a li lon. open pi tenpo sike #MAM (#2020) la, ona li pakala. tan pi pakala ona li sama pakala pi nena Pinatupo. ko seli li tawa sewi, li kama lon poka telo. ni la, telo li kama kon, li pana e kon seli ike tawa sewi tawa ma. pakala mute li lon, taso ona li suli ala tawa pakala pi nena Pinatupo. tenpo ni la, lawa li awen lukin li awen lawa e nena ni.

nanpa tu wan la, nena Kanlajon. tenpo ni la, ona li awen pakala. pakala ona li lili, taso ona li mute, li suli meso. nena ni li lon ma telo Neko⁹, li lon poka pi ma tomo Kanlajon. pakala mute li lon, taso ona li lili tawa nena Pinatupo tawa nena Tala. taso, ona li pakala mute e ma. lon ma ni la, ma pan mute en ma kili mute li lon. tan pakala ni la, ma ni li pakala, li pana ala e pan e kili. ni la, ma ni li ken ala kama jo e mani tan esun.

nanpa pini la, nena Majon. tenpo ni la, ona li awen pakala, li pakala mute a. nena ni li lon poka pi ma tomo Lekapi¹⁰. tan pi pakala ni li ante lili tawa nena ante lon tenpo ni. telo ma seli li tawa sewi la, ona li awen lon sewi pi nena ni. taso, ona li ken pakala. wawa lili taso li wile. tan ni la, ko seli en nena ni li pakala. ona li pana e kon ike mute tawa sewi, li pana e kon seli mute tawa ma anpa. tan pakala ni la, ma tomo poka li ken ala esun e moku, sama ma tomo poka pi nena Kanlajon. kin la, jan mute a li lon poka ni kin. ni la, jan mute li tawa weka tan nena ni.

tenpo ni la, nena tu ni li awen pakala. ni la, lawa li awen lukin li awen kama sona li awen sin e ijo pakala. ni li ale a. sona pona!

¹ Taal Volcano, ² Mt. Pinatubo, ³ Mayon Volcano, ⁴ Mt. Kanlaon, ⁵ Pacific Ocean, ⁶ Angeles City, ⁷ Cavite Province, ⁸ Batangas Province, ⁹ Negros Island, ¹⁰ Legazpi City