o kama sona e ma sin lon poka sina! musi ni la tenpo suno ale la ilo li pana e sona ma. sina o tawa ma ni. ni li musi pi alasa ma.

sona ma li kama tan seme?

musi ni li kama lon tan sitelen Ekesite (XKCD) nanpa TTAMLW¹. sitelen li toki e nasin ilo:

ilo li kepeken nanpa open pi tomo mani lon ma tomo Nujo. tenpo suno ale la nanpa pi tomo mani li ante mute. ni la jan ala li ken sona e nanpa pi tenpo kama suli. ona li ken sona e nanpa pi tenpo suno wan taso.

ilo li lukin e nanpa ni li ante e ona tawa nanpa pi linja ma.

nanpa pi linja ma li seme? linja suli li kipisi e ma ale. nasin linja tu li lon: linja wan li sike. ma lete li lon insa sike. sike li lili lon poka pi ma lete li suli lon ma seli. linja ante li tan ma lete wan tawa ma lete ante. tenpo la sina wile pana e sona ni tawa jan ante: ma lili wan li lon seme? kepeken nanpa linja la jan ale li ken sona.

musi ni la nanpa mute pi linja ma li kama lon. jan ale li ken tawa ma lili lon poka ona tan ni.

mi wile musi la mi o seme?

ilo li pana e sona ma la sina o alasa e ma ni o tawa ona. tenpo mute la ma ni li sin tawa sina. ni la sina ken pona e sona sina pi ma poka!

sina kama tawa ma pona la jan ante kin li ken lon. ni la sina ken kama sona e jan ante pi musi ni. kulupu li pona a!

tenpo alasa li pini la sina ken toki e tawa sina lon lipu kulupu². jan li ken lukin e toki tawa pi jan ante lon lipu ni.

kin la sina ken kama jo e lipu lili. ona li toki e pali pona sina. alasa ma la musi mute li ken lon. ken la sina tawa lon telo. ken la sina alasa e ma lon tenpo pimeja anu lon open pi tenpo suno sin. sina lon ma pona la ken la sina pali e sitelen, anu sina jo e len musi, anu sina pali e jan pi ko lete. ni ale en ante mute la sina kama jo e lipu lili tan kulupu. lipu li toki e ni: "jan ni li [pali e ijo musi X] lon alasa ma pi tenpo suno Y."

o musi pona!

¹ https://xkcd.com/426/
² https://geohashing.site/