tenpo pini majuna la, ma li ante mute. monsuta lili en monsuta suli li lon. ona li soweli ala, li akesi ala, li waso ala. taso ona li sama ni ale: ona li tawa li moku li unpa li mama sama waso, sama akesi, sama soweli. sina ken toki e ni: lon tenpo pi suli mute la, monsuta ni li lawa e ma.

tenpo wan la, mun suli li kama ma kepeken wawa wawa, kepeken tenpo lili taso. ona li pakala mute mute e ijo ale, li moli a e monsuta majuna ni. lawa pi monsuta majuna li pini.

ken suli la, sina sona e ni ale, li sona kin e ni: tenpo lawa pi monsuta majuna la, soweli li lon, taso soweli li lili, li sama a tawa soweli ante. tenpo pi pakala mun la, soweli li kama mute, li kama suli, li kama jo e wawa pi ante mute. tenpo ni la, soweli li lon ale, li awen pona lon ma ona kepeken wawa ni. tenpo ni la, sina lukin e soweli tu la, sina ken lukin e ni: soweli nanpa wan en soweli nanpa tu li ante mute a! soweli li ken kala, li ken waso, li ken akesi kin.

tan seme la, soweli li kama suli?

jan li sona pi ale ala e tan ni, taso ona li ken alasa e sona sin. tenpo pini lili la, jan sona li pali e sona ken sin pi kama suli soweli. ona li toki e ni: soweli li kama suli la, soko li suli a!

tan seme la, soko li suli tawa kama suli soweli? ma li sama seme lon tenpo pi pakala mun? nasin seme la, soweli li kama lawa lon ma?

mun pakala li kama ma la, ona li anpa e ken awen pi ijo mute. ona li suli a, li pana e kipisi lili ma mute tawa ale sewi. kipisi lili ni li kama kon jaki pi walo pimeja, li selo e ma tan suno. moli li lon ale.

soko en moli li pona tawa ona ante. ni la, soko li kama suli lon ma ale. ona li moku pi tenpo suli e sijelo pi monsuta moli, li len e ma tan moku ni. ona li pana e lili mama ona tawa kon. lili ni li jaki mute, li kama lon insa sijelo pi monsuta majuna. sijelo pi monsuta majuna li ken ala awen lon ni: jaki soko li awen lon. sijelo li moli, li kama moku tawa soko ante a.

taso sijelo pi monsuta majuna en sijelo soweli li ante, li jo e ilo ante, li kepeken nasin ante tawa wile sama. pakala kama la ante li ken suli a tawa toki alasa ni: seme li moli? seme li moli ala?

nanpa wan la, soweli mute pi tenpo majuna li lili, li awen mute lon anpa ma. pakala mun li ante lili e ma pi anpa ma; ma pi supa ma li kama lete, li kama pimeja, li kama weka tan kasi. ma pi anpa ma li lete, li pimeja, li jo ala e kasi lon ale. soweli pi anpa ma li ken awen lon ni tan tenpo pini. anpa ma la, sijelo soweli li ken awen pona. ma pi supa ma li kama sama ma pi anpa ma la, soweli li tawa supa, li pali e tomo ona sin lon supa. tan ni la, ona li kama ante tan ona ante.

nanpa tu la, soweli li jo e sijelo seli. (monsuta majuna kin li seli e sijelo ona, taso seli tu ni la, soweli li seli nanpa wan). sijelo soweli li ilo e seli ona tawa utala jaki. seli soweli li pakala e awen pi jaki soko lon sijelo ona!

nanpa tu wan la, soweli en monsuta majuna li moku e kon pona li weka e kon jaki. ona tu li jo e ilo kon tawa ni, taso ilo tu li ante. moku kon en weka kon la, ilo kon monsuta li pona namako tawa ni: monsuta li tawa kepeken kon lili. ante la, soweli li moku e kon mute tawa ijo sama.

ni li pona tawa monsuta majuna. tan ni la, monsuta majuna pi ale ala li moli. monsuta pi moli ala li kama waso!

taso ilo kon pona li ken ike kin. ilo kon pi monsuta majuna li pona a, li kama e kon pona tan kon ale tawa ale pi sijelo ona kepeken pali lili. taso, jaki soko li lon kon ale la, monsuta majuna li kama e jaki soko lon ale sijelo kepeken pali lili kin! ona li wile utala e jaki ni la, utala li wile e pali mute a. ilo kon soweli li ike lili tawa esun kon, taso ona li awen pona e sijelo tan jaki! soweli li ken utala e jaki soko kepeken pali lili a.

ale la, ma pi pakala mun li pana e ken ni tawa soweli: o kama lawa e ma pi open sin!

lipu tan:

• https://pmc.ncbi.nlm.nih.gov/articles/PMC7365386/ (toki Inli)
• https://journals.asm.org/doi/full/10.1128/mbio.00521-26 (toki Inli)