o lon ma. o lukin e kiwen lon ma. o jo e kiwen. ona li pona tawa lukin la, sina wile awen e ona. taso sina ken ala ken awen e ona lon tenpo suli? sina pana e ona tawa poki sina la, ona li kama ala kama pakala?
kiwen li kiwen - sina wile pakala e ona la, ni li wile e wawa. taso pakala li ken, li ken lon kiwen ale a. ni la, sina ken wile sona: kiwen seme li wawa a lon kiwen ale? kiwen ante li pakala mute la kiwen seme li pakala lili?

a, nasin pakala mute li lon la, nasin wawa mute li lon.
mi ken pakala e kiwen kepeken seli. kiwen li awen kiwen lon seli li awen wan lon seli wawa la mi ken ala pana e seli ale tawa pakala kiwen.

ni la, mi o pakala e kiwen kepeken kiwen ante. ni la, mi ken sona: kiwen seme li awen lon tenpo suli? mi pana e kiwen pona wan tawa poki la, kiwen ante kin li lon poki la, kiwen seme li kama ala pakala?

mi tawa wawa e kiwen wan tawa kiwen ante. kiwen tu la, kiwen wan li kama pakala la kiwen pi pakala ala li wawa tawa kiwen pakala.
a. taso nasa li lon nasin pakala ni. mi pana e kiwen wan tawa sike ko wan la ko li ken wawa suli li kama ala pakala. taso mi wile sona e wawa kiwen, e wawa pi nasin kiwen. kiwen seme li kiwen a.

pona la, nasin ante li lon.
mi kama e kiwen wan lon kiwen ante. mi anpa e kiwen sewi lon selo pi kiwen anpa. kiwen anpa li pakala la, kiwen sewi li wawa tawa kiwen anpa.
mi awen tawa e kiwen lon kiwen ante la mi kama sona e kiwen pi wawa suli lon kiwen ale. kiwen ni li seme?

ona li ken suwi tawa lukin - taso mi kama jo e ona lon ma la suwi ni li wile e pali: suno li tawa insa ona lon sinpin la, monsi la, kiwen li ken pana sin e suno lon nasin musi. suno walo li ken kama tu anu mute, li tawa poka ante. nasin suno li namako lon ni.
jan li kama ala lukin e kiwen ni lon ma lon tenpo mute. ni la ona li mani.
kiwen ma ante la, kiwen ni li wawa lon ijo tu. wawa nanpa wan la kiwen ni li ken pakala e selo pi kiwen ante. wawa nanpa tu la, seli li kama lon kiwen ni la, kiwen li pana sin e seli kepeken tenpo lili a. jan li wile suli e wawa ni tu la, ona li ken pali e kiwen sin. taso ma la, kiwen wan taso li wawa nanpa wan lon ni tu.

a, taso kin la, o sona e nasin pakala tu lon ona.
nanpa wan la, mi tawa wawa e ilo kiwen tawa kiwen ni pi wawa suli la, ona li pakala. kiwen li tawa lon selo pi kiwen wawa la, ona li pakala ala. taso ilo mi li tawa wawa la kiwen li kama pakala.
nanpa tu la, kiwen wawa li tawa lon kiwen pi wawa sama la, kiwen ni tu li ken pakala.
wawa kiwen li awen ala e kiwen wawa.

o lon ma. o jo e kiwen tan ma. kiwen o pona tawa lukin sina. sina wile ala pakala e ona la - a, sina wile ala pakala e ona la, o pana e kiwen wan taso tawa poki sina.