tenpo pini la, ma Juke li utala e ma Tosi la, jan sona Alan Tuwin li lon ma Juke.

ona li sona a e nasin nanpa e nasin ilo la, ona li pali tan lawa pi ma Juke e ilo sona wawa Ponpe . ma Elopa la, lawa pi ma Tosi li toki tawa kulupu utala pi ma Tosi kepeken toki pake. toki pake ni li wawa a la, kulupu utala pi ma Juke pi ma ante li sona ala e kon pi toki pake. ilo sona wawa Ponpe li weka e pake ni. en ma Juke en kulupu ma ona li sona e toki lawa pi ma Tosi kepeken ilo li pakala e kulupu utala ona la, en ma Tosi en kulupu ma ona li ike lon utala li pakala.

ni la, jan sona Alan Tuwin li pona a tawa ma Juke. tenpo mute la, jan li toki pona e ona li pilin pona wawa tawa ona. kin la, ona li pali e nasin nanpa namako e nasin sona namako la, ma ale la, jan mute li sona e nimi ona. nasin sona namako wan ona li alasa sona Tuwin (Turing Test) anu musi jasima(pu) (Imitation Game) li ni: “tenpo mute la, jan li alasa e ni: ‘ilo li ken ala ken pilin?’. mi alasa ante. mi alasa taso e ni: ilo li ken ala ken toki sama jan kepeken nasin ona. ni la, nasin ilo li mama e ijo sama pilin jan la, ante li seme?”

taso ma Juke li ike mute tawa jan sona Alan Tuwin tan ni: jan sona Alan Tuwin li mije pi olin mije li mijomi. tenpo ni la, jan mute li ike tawa jan mijomi. kulupu lawa li wile pini e mijomi li lawa ni: “kulupu jaki mije mije lon insa tomo, lon weka tomo li (wile/alasa/awen/kama) jaki suli kepeken mije ante. […] jan li ijo ni la, ona li pakala e lawa li tawa tomo awen lon tenpo suli.” nimi ‘jaki suli’ li mijomi li olin mijomi li unpa mijomi.

tenpo pimeja wan la, jan ike li kama tawa insa pi tomo pi jan sona Alan Tuwin li lanpan e ijo. tenpo suno la, ona li tawa jan awen lawa li toki tawa ona e ni: ‘jan ike li kama. ona li kute e lawa ala. o awen e lawa!’.

jan awen lawa li kama tawa tomo la, ona li lukin e ni: en jan sona Alan Tuwin en mije ante li lon… li olin. ona li toki e ni: ‘sina mijomi a! sina kute ala e lawa! sike ike!’.

kulupu lawa li kama sona e pakala lawa ona la, ona li ike tawa ona li toki tawa jan sona Alan Tuwin e ni: ‘ken tu li lon. o weka e wan. o lon ante. sina ken lon tomo awen pi jan ike anu ken lon tomo sina. taso sina lon tomo sina la, o moku e misikeke meli. misikeke meli li meli e sijelo sina li weka e wile unpa sina.’

ona li awen lon tomo ona li moku e misikeke. taso ona li meli ala la, sijelo ona li kama meli la, ona li pilin ike li pilin jaki li wile moli. ni ale la, tenpo wan la, ona li moku e kili pi ko moli lon insa. ona li moli.

tenpo mute li kama. kulupu lawa li ante e lawa ona li weka e lawa ike tawa mijomi. suno mute li tawa sewi li tawa anpa. ma li sike mute mute mute mute a e suno la, kulupu SULI li kama pilin utala li toki utala. jan Koton Po pi kulupu lawa li toki e ni: “kulupu suli li wan li toki e wile ni: lawa li sona e ike ona tawa jan sona Alan Tuwin. lawa lon tenpo ona li ante li lawa e ona. mi ken ala ante e ni. taso lawa ni li ike li jaki li ike tawa ona. mi toki tan kulupu lawa e ni: mi pakala. sina wile e pona.”

taso o lape ala. ni li pini ala. kulupu lawa sama li lon. lawa ona li ante lili taso. ma Juke li lawa ala e mijomi e melomi la… taso ona li awen lawa ike e tonsi. o awen pilin utala. mi ale li kulupu suli li awen wan la, ante li ken. o awen wan. o weka ala e sona pi jan sona Alan Tuwin.