ma Lijatuwa¹ o, ma mama mi o! sina
sama pona a. jan li weka e sina li
lukin pona e sina. mi wile e sina
la, mi lukin li toki e pona sina.

[5] meli sewi, o awen e ma Sentokowa²,
o suno lon lupa Asulo³! o awen e
ma Nawakuta⁴ e kulupu nasin ona!

kepeken nasa la, sina pana e pona
tawa mi a. mama li pana e mi tawa
[10] awen sina la, mi tawa e selo oko⁵.
mi ken tawa open pi tomo sewi sina.
mi pana e pona tawa sewi tan lon mi.
nasa la sina tawa mama e mi ale!
tenpo ni la, o tawa e kon wile mi
[15] tawa nena lon ma kasi, tawa ma suli
laso lon poka pi linja telo Nemen⁶ a,
tawa ma pan. pan mute li sitelen e ma.
ma li jelo li walo tan pan. ona kin li
jo e kasi jelo, e pan walo sama ko,
[20] e kasi suno pi loje walo. kin la,
linja laso li kipisi e ma ale a.
kasi kili pi mute lili li lon ona.

¹ Lietuva.
² Częstochowa, ona li ma jan lon ma Posuka.
³ Aušros [vartai], ona li lupa open pi ma jan Vilnius.
⁴ Навагрудак (Navahrudak), ona li ma jan lon ma Pelalusi.
⁵ sike lukin lon lawa sina!
⁶ telo Niemen.