→ ilo Tujolinko¹ li ilo pi kama sona toki. jan li kepeken ilo Tujolinko tawa open pi kama sona toki. nasin ona pi pana sona li ni: jan o ante toki e nimi pi toki ante. tawa ni la, jan kepeken o pana e nimi wile lon linja nimi pi ilo Tujolinko. toki mute li lon ijo Tujolinko. toki pali kin li lon ijo Tujolinko. toki pali ni li toki Epelanto li toki Walelijan sewi li toki Sinan. toki pali ni li lon ilo Tujolinko la, toki pona o lon ala lon ilo Tujolinko?

jan mute pi kulupu pi toki pona li toki e ilo Tujolinko. tenpo sike luka tu tu la, jan mute pi toki pona li toki e ni tawa jan pi ilo Tujolinko: “o jo e toki pona lon ilo sina!” a, tenpo la, mi pilin sama. jan mute pi toki pona li pilin sama. taso, jan mute pi toki pona li pilin ante. tenpo ali la, ilo Tujolinko li pali ala e kama sona sin pi toki pona. ken la, ni li ken ala ken ante kepeken nanpa ISO pi toki pona? mi la, ni o ken ala. tenpo ala la, toki pona li lon ilo Tujolinko.

jan pi toki pona li sitelen e wile tawa jan lawa pi ilo Tujolinko. wile ni li ni: ilo Tujolinko li kepeken toki pona lon ilo ona pi pana sona. jan pi toki pona li sitelen mute. jan pi toki pona li sitelen e wile ni lon tenpo suli. tenpo ali la, jan lawa pi ilo Tujolinko li sitelen ala tawa jan pi toki pona. taso, jan pi ilo Tujolinko li sitelen e ni lon lipu ona:

“toki pona la, mi wile kepeken ona tawa pana pi sona ni taso: toki pona li ijo pi musi nasa tawa jan pi ilo Tujolinko. toki pona li toki pi nasin lili. toki pona li pona e lawa sina!”²

nimi ni li musi ala e mi. ni li lon: jan lawa pi ilo Tujolinko li wile ala pana e toki pona lon tomo ona. ona la, toki pona li suli ala li musi taso li wile ala lon tomo ona pi pana sona. ni li ike lili.

taso, tenpo ni la, jan lawa pi ilo Tujolinko li pake³ e pana sona pi toki pali ali. o sona e ni: tenpo pini la, ilo Tujolinko li jo e poki⁴ pi toki sin. ona li poki pi pana sona. poki ni li open e pana sona pi toki ante sin lon ilo Tujolinko. tenpo ni la, poki ni li weka. weka poki li pini e open pi sona toki sin lon ilo Tujolinko. weka poki li pini e open ken pi toki pona kin. nasin ni li ike anu seme? ilo Tujolinko li pana e sona toki la, ilo Tujolinko li suli e nanpa pi jan toki tawa toki ni. taso, jan mute li pilin e ni: ilo Tujolinko li pana e sona pi toki pona kepeken nasin ike. ona la, nasin ike li seme? ona la, nasin ike li ni lon ken:

1. linja nimi pi ilo Tujolinko li nasa. nimi nanpa wan o suli lon linja nimi! taso, toki pona la, nimi nanpa wan pi linja nimi o lili! kin la, ilo Tujolinko li pana pona taso e sona nimi. toki pona la, ilo Tujolinko li pana ike e sona pi nasin toki e sona pi lawa toki.
2. jan li pali e ante toki pi toki pona la, nasin mute li ken! taso, ilo Tujolinko la, ante toki pi mute lili li ken. tenpo la, ante toki wan taso li ken. nasin ni li ike e sona pi jan sin. toki pona la, ante toki pi mute mute li ken li pona.
3. toki pona la, lipu ante pi pana sona li lon li pona mute! lipu ni li lipu “lipu sona pona”⁵ li lipu “toki pona lessons.”⁶ lipu pona ni li lon la, ilo Tujolinko o pana kin e sona pi toki pona tan seme?
4. toki pona li lon ilo Tujolinko la, ilo Tujolinko li suli e kulupu pi toki pona. taso, kulupu pi toki pona o awen lili. kulupu lili li kulupu pona.

ike ken ni li lili e pona pi ilo Tujolinko tawa toki pona. toki pona li weka tan ilo Tujolinko. ken la, weka ni li weka pona. ijo wan pini li lon li ni: jan li ante e toki musi pi ilo Tujolinko kepeken toki pona. ante toki ni li lon lipu Tujosoli.⁷ lipu ni li pana e nimi pi toki pona kepeken sitelen Lasina, kepeken sitelen pona kin.⁸ ni kin li pona. ilo mute pi pana sona li lon. ilo Tujolinko li ilo pi wan taso. pona li ni: kulupu pi toki pona o kepeken ilo ante tawa kama sona pi toki pona.

¹ toki open la, nimi ona li “Duolingo”
² lipu open li kepeken toki Inli li kepeken toki Epelanto. ona li lon lipu ni: https://blog.duolingo.com/why-learn-a-made-up-language/
³ jan li “pake” e ijo la, ijo ni li pini anu ken ala tawa.
⁴ toki open la, nimi ona li “Incubator”
⁵ ni li tan jan Lentan. ona li lon lipu ni: https://lipu-sona.pona.la/
⁶ ni li tan jan Misali. ona li lon lipu ni: https://www.youtube.com/playlist?list=PLuYLhuXt4HrQwIDV7FBkA8zApw0pnEJrX
⁷ toki open la, nimi ona li “Duostories”
⁸ ni tu li lon lipu ni: https://duostories.org/tok-en | https://duostories.org/tok2-en