tenpo pini la mi lukin e sitelen tawa lon suno wawa.
mi kute e jan sona Misijo Kaku. ona li toki e ni: jan pi toki musi li toki ala lon mama nanpa wan pi mi mute tan seme?
tenpo ni la mi wile toki, mi toki musi ni:

ma mi la suno li mama ala,
jan sona li toki e ni.
suno li suli tawa ma,
taso ona li suno lili.

insa ala pi kulupu suno mi la,
tenpo pini mute la,
suno suli suli suli li lon.
suno ni li moli la,
ona li kama suno wawa.

ma mi la suno li mama ala.
suno wawa li ken mama.

ona li mama pi mun ante,
li mama pi kiwen ale,
li mama pi kiwen mani,
li mama pi sijelo mi.

suno wawa o,
sina moli lon tenpo pini.
sina pana e ijo ale tawa mi.