tenpo ale la ilo li lon poka mi. wile ale mi la ona li ken pana e pona. wile la mi toki tawa jan. wile la mi lukin e sitelen. wile la mi kute e kalama. wile la mi pona e sona mi. ona li ken ale e mi.

o sona e ijo suli: ilo sina li poki pi ilo mute. ilo wan li supa, li kute e luka sina, li pana e nanpa. ilo ante li kiwen, li pilin e nanpa, li pali e wile nanpa. ilo ante kin li poki, li ken awen e nanpa lon tenpo suli. ilo ante kin li lipu pimeja, li ken pana e sitelen kepeken suno.

ilo ale li sona e ilo ale anu seme? sona ala. ilo wan taso li toki tawa ilo luka, tawa ilo pilin, tawa ilo poki, tawa ilo sitelen. ona li lawa e ilo mute, li wan e ona. ni la ona li ilo lawa. sina ken ala ken luka e ilo lawa? ken ala. ona li kiwen ala, li nanpa taso. jan li pali e ona kepeken toki ilo.

ilo lawa li lon la, ilo sin pi kiwen ala li ken toki tawa ona. ilo li ken alasa e sona lon poki. ilo li ken alasa e ilo sin lon kulupu ilo. ilo mi li ken toki tawa ilo sina. wawa ale.

ken suli la sina sona pona e ale ni. taso pakala seme li kama lon ilo mi a? poki mi la sona mute li lon. poki li kama ken ala awen e sona sin. ilo poki o awen pali pona la mi o weka e sona tan poki. ike la mi ni ala lon tenpo suli.

tenpo wan la mi toki tawa ilo mi. ona li toki tawa kulupu ilo pi ma ale, li sin e ilo ale mi. ilo sin o lon poki. taso poki li ken ala awen e ijo sin. mi weka e ilo pi sin ala, li awen ala e ilo sin. ilo li pini li pali ala. pakala. mi o seme?

mi kama jo e kiwen lili. kiwen ni li ken jo e sona. mi pana e ilo lawa sin tawa insa kiwen. mi pana e kiwen tawa ilo mi. ilo pilin en ilo luka en ilo sitelen en ilo poki li kute e ilo lawa pi kiwen lili.

pali li pini anu seme? pini ala. ilo lawa o lon poki suli pi ilo mi, o lon ala kiwen lili taso. mi o tawa e ona.

mi lukin e sona ale lon poki ilo. nanpa wan la mi weka e sona mute pi wile mi ala. poki li kama ken jo e ijo sin. nanpa tu la mi pana e ilo lawa tan kiwen tawa poki. nanpa tu wan la mi weka e kiwen lili. ilo li awen pali pona. wawa.

mi toki e ni ale tan seme? nanpa wan la mi la pali mi li musi. tenpo lon la poki mi li jo e ilo lawa sin, e ilo lawa pi sin ala. nasa musi anu seme? mi weka ale ala e ilo pi sin ala. mi o ni lon tenpo kama.

nanpa tu la o sona pona e ilo sina. sina sona mute e ona la ilo li pakala la sina ken pona e ona kepeken pali lili taso.